彭翔翎揸的士遇「西客」由上車鬧到落車：20幾分鐘不停用粗口鬧我

彭翔翎（Janice）今日（23/12）現身荃灣出席無綫熱播劇集《異空感應》宣傳造勢活動。提到無劇拍兼職揸的士搵食，幫補生計，彭翔翎接受《香港01》訪問時直言：「其實呢份工唔易做。試過有次有個客人，透過Call車平台要車，當我接到張單之後，我就跟住個app嘅指示路線去接個客，點知我手機顯示嘅地方，同個客人嘅位置有偏差，搞到佢搵唔到我，我又見唔到佢，搞咗十幾分鐘，最終透過電話搵到嗰個男乘客。」

彭翔翎續說：「當佢見到我部車到嘅時候，佢一開門就好大聲咁鬧我，然後上車又好大力咁閂門，然之後夾集英語、韓語、廣東話好大聲咁用粗口鬧我，由半山落去中環，車程20幾分鐘不停係咁俾佢鬧，我唯有不停咁同佢道歉講唔好意思，但佢都冇理我，一直鬧到落車。呢件事係我揸的士被人鬧得最勁一次。」