【任噏亂評．港姐2017】台北泳裝要裝文青 ？ 平腳泳褲係咩玩法
撰文：洪曉璇
出版：更新：
+3
一年一度港姐選舉正進行得如火如荼，近年必備外景拍攝（當然有贊助…）有靚人靚景睇下，心曠神怡的確唔錯，2012年到英國倫敦，2014至2016年到日本沖繩、東京、福岡，今年？？？近近地飛個半鐘就到嘅台北，好似弱咗少少……
正如打工仔出trip，就唔會再有返放工時間，老闆總是認為「有得出trip益咗你，做多啲嘢先好返嚟」，港姐台北拍攝行程亦非常密集，由落機一刻就開始拍攝，一日兩三個拍攝點，去服裝店襯衫、到大學跟資深藝人學演戲、當然唔少得泳裝環節。為了減低賣弄色情感覺，於溫泉旅館拍攝加添文青氣息，絕對是合情合理。
難得嘅係今年12位佳麗身型都好fit，『竹昇妹』亦唔會偏大隻，今屆總算係應有則有，佳麗們面對密集拍攝亦未顯疲態，但……
妙齡少女身穿三點式一字排開出場，本是養眼畫面，但見到這套精心設計的泳衣竟如時光倒流！看似波希米亞設計，用上三隻顏色「扮」漸變feel，但選上藍綠黃等冷色系，令人更顯蒼白；平腳泳褲設計可減少走光機會本來係好貼心，但同時令長腿似被斬開個個變成矮冬瓜，黑色及寶藍色泳褲，令大家一刻疑惑，到底是體育堂制服，還是拿錯了男裝泳褲……
到腳上涼鞋，今時今日女士着拖鞋都懂得選擇暗踭人字拖拉高身型比例，港姐首次泳裝見傳媒，居然着上松木厚平底一字帶涼鞋，顏色非藍即綠，女人街旺中甚至淘寶都有大量相同款式出售，三十多元有成交，扮港姐其實好易﹗
曾經香港小姐是小女孩們最愛的角色扮演，少女們穿着打扮指標。當年張曼玉、袁詠儀、蔡少芬等參選時的泳裝照，至今仍為人津津樂道。其實要營造一致感覺，除一色一樣制服團隊般現身，設計亦實在需要緊貼潮流，或許提出色tone讓佳麗自泳裝，出來效果會更好。
【港姐2017．多圖有片】胡美貽泳衣即加分 17歲mandy：我骨架大【港姐2017】港姐水著終極圖輯 11號胡美貽成功突圍【港姐2017】Juliette 有個牙醫男友：鍾意佢夠血腥【港姐2017】巴打聽到好開心 大熱港姐17歲Mandy :而家唔想拍拖