香港學日本街道禁煙好唔好？　黃心穎：民生問題更急切解決

患有嚴重鼻敏感的筆者每次嗅到煙味都必然發作，有時在街上遇到前面有人食煙，頓時會變了百米跑手，跑到更前的路上避開二手煙，剛好近日網上有人倡議香港效法日本街道禁煙，《香港01》致電黃心穎問到其睇法，她表示一般遇到別人在街上食煙，都會行開少少：「我覺得有時太多限制喇，冇話太介意，唔想吸咪行遠啲，費事大家唔開心，當然唔使吸到會更好。」

心穎又坦言禁煙不是香港首要解決的事：「例如樓價好貴更加急切，其他民生問題會重要啲，係需要上的問題。」談到菲律賓總統杜特爾特最近推動禁煙令，違法吸煙除了罰款，更有機會坐監，心穎就話：「每個國家都唔同，好似新加坡都唔畀食香口膠，但如果個個國家都一樣，我點解要住喺香港呢？」

而在外國長大的朱千雪就話因為自己不是煙民，所以不清楚香港有關吸煙的條例：「不過我記得細嗰時香港啲餐廳分咗吸煙區同非吸煙區，依家係全部都唔畀㗎嘛，都係個好開始嚟。」千雪亦認為一般人覺得吸煙和健康有關，但有的煙民會覺得這只是一個習慣，不應批評別的人習慣：「但如果揀男朋友，我都想揀個唔食煙嘅，因為我都唔食，朋友或者同事就冇咩所謂。」

而早前被人影到拎住電子煙吞雲吐霧的何雁詩（Stephanie）就話：「市區街上禁煙都OK嘅，都係好事嚟嘅，因為市區人口密集好易煙親人哋，唔係個個都想成頭煙㗎嘛！」Stephanie更表示絕對不會再在公眾地方食電子煙，看來她也是一個自律的煙民。