【港姐2017】佳麗即席鬥戲　劉穎敏：只要諗下父母離世就喊得出

港姐行程緊密，影完外景就去火速去到國立臺灣大學，向台灣資深藝人許傑輝學做戲。睇到其中4號劉穎敏（Angela）及5號梁雯蔚（Sandy）就即席設計場面演戲被老師點評。Angela示範了一打開門見到有人死咗就跪地爆喊，即刻瘋狂為對方做心肺復甦；而Sandy就做返自己，扮去旅行睇風景，周圍影相。

Angela就話自己太落力，一跪落地個下就撞親，紅咗少少，有啲痛。點解要做戲爆喊？佢就話：「一直以嚟好鐘意做戲，喺屋企得閒都係Role Play，所以今次有呢個機會，都想做啲難度高嘅場面。」Angela跪地爆喊個下，佢話自己差啲喊得出：「個時就諗起我阿爸阿媽，一諗起佢哋死咗就真係接受唔到，就好想喊，講講下我都驚會喊。」好在，佢爸媽都仲健在。

呢個時候，訪問Angela同Sandy的另一邊廂，1號的張寶欣接受其他訪問時，突然眼濕。事後再問她，她說：「我睇到Angela做心肺復甦，嗰下好震撼，有啲毛管戙，（係咪好眼淺嘅人？）我本身同理心比較強。（聽講Angela諗起父母死咗喎。）唔係啩，咁唔係幾好。」