《愛回家》小花入行8年戶口得2位數　愧對家人：覺得自己好冇用

葉蒨文 （Sophie）日前（3/12）現身尖沙咀出席台慶劇《黑色月光》齊睇大結局。Sophie於2016年透過參選香港小姐競選加入無綫，憑住甜美外貌火速加入TVB處境劇《愛·回家之開心速遞》，成功憑「Candy」一角入屋，備受網民喜愛。

Sophie接受《香港01》訪問時透露入行8年，直言頭3年相當難捱，經常開工不足戶口只剩下2位數字，自責愧對家人：「其實我係單親家庭成長，媽咪一直都俾好多鼓勵我，佢知道我好鍾意演戲，變咗佢從來都唔會俾壓力我，亦會反過來安慰我，叫我唔使擔心家庭嘅開支，佢會搞得點。但到我踏入咗30歲之後，我係會覺得內疚，會反問自己係咪應該要回饋返一啲嘢俾媽咪，有時候都會覺得自己冇用。因為媽咪係一位女強人，有時候見到佢一個人養大我哋3個小朋友，我好想好似佢咁叻。」

Sophie面對收入不穩定，為減少開支，會選擇乘坐公共交通工具出入：「其實我而家都仲係會搭港鐵返工放工，同埋我都鍾意食公司兩餸飯，因為好抵。同埋試過戶口得返兩位數，被媽咪知道咗之後，佢話俾錢我，但去到我咁嘅年紀我係要唔落手，最終我係拒絕咁佢冇要到。（而家收入穩定過以前？）其實都唔係好穩定，《愛回家》劇情有時寫我會多啲，有時候又會寫我少啲，變咗就會好直接咁影響到收入，係呢幾個月好少少，都有啲廣告搵我，咁所以我都好感恩，明白到呢行係少咗好多工作，明白整體個市況都唔係咁好。」