古天樂被問明年會否繼續開戲：我唔開電影，我做五金？

古天樂今晚（29日）現身Tatler Ball 2024 時裝盛會，並由甘比頒發「鑽石成就大獎」。古天樂接受訪問時透露剛完成賀歲片《臨時決鬥》拍攝，最難忘是拍攝期間經歷了幾次風，曾擔心影響進度，幸最終順利完成，又表示戲中所有人都要打，連「魚蛋妹」王尹菁都不例外，問到有無信心作品比《嚦咕嚦咕新年財》更經典，他說：「有信心，超唔超越另一件事啦，最緊要大家睇得開心啲。」

鍾雪成金馬影后，古天樂表示已祝賀對方，由於之前要開工，所以未有機會食飯，但相信之後會有機會。另外，古天樂亦有留意《破·地獄》票房過億，會否有電影業復甦感覺，他說：「有咁多戲過億係開心事，咁多年都好難有部過億，仲要兩年有三套，但電影圈應該係整體性，今年拍攝係少咗，我希望之後會好啲，因為有啲從業員成年幾無工開。」古天樂又謂早前有與政府商討，雖然「大家都忙，但都有啲進展。」問到明年會否繼續開戲，他反問：「我唔開電影，我做五金？」