陳自瑤為翠如陀B感到開心　曾陪對方走過小產低谷

43歲黃翠如跟蕭正楠結婚6年，今日 （17日）黃翠如於社交網正式公佈有喜，更自揭早年曾經流產。身為好妹妹嘅陳自瑤今午出席胡曦文新店開幕時，表示較早前已知悉翠如陀B，並謂：「首先我代佢多謝大家，我之前都已經知。好戥佢開心，真係好戥佢開心。（知佢小產？）我哋一齊走過高山低谷。」陳自瑤認為每日陀B狀況都不一樣，所以她只能分享個人經驗，問到翠如陀B反應，她表示：「佢應該都OK，有機會你再問下佢啦。」

陳自瑤與連詩雅、黃翠如情同姐妹，隨著連詩雅愛女Baby Camila出生，令陳自瑤久違地再次抱B，但她笑言自己嘅湊女經已脫節。「因為我面對嘅小朋友青春期，而佢哋係初生期，但有時傾下都開心嘅。見到B女都會諗起個女細個好得意，時間過得好快，湊嘅過程有啲漫長，但回頭一看時間係好快。」隨著女兒踏入青春期，開始有個人主見，陳自瑤表示會用朋友mode同女兒相處。