七師傅一入馬場即助友人拉頭馬 狠批保錡戀情：一定無結果
撰文：鄺鈺瑩
出版：更新：
七仙羽（七師傅）今日現身沙田馬場，打扮靚靚嘅佢啱啱拉完頭馬，不過佢話過程一啲都唔簡單。 「我本身識得同寵物溝通，每日都會喺屋企同螞蟻傾偈。去年莎莎婦女銀袋日，我朋友隻馬本身好冷，我同佢傾偈『你知唔知其他馬都唔得，你要知道自己有幾多斤』你叫佢加油佢唔知，佢最後有贏到第一。頭先我朋友隻馬從來未贏過，我落去沙圈同佢一齊兜圈，同佢『Listen to me』但佢因為唔識我，所以搖頭擺尾，到後來佢我好認真咁同佢講要跑第一，之後又幫騎師加持，忙到不得了，最後都跑到第一。」七師傅表示由於要加持、追馬，又有唔少人搵合照，所以自己無時間落注。
七師傅向來與ERROR友好，問到佢點睇保錡同菊梓喬新戀情時，估唔到七師傅竟然話：「梗係無結果啦，一定無結果。第一我覺得唔係真，保錡事業心重，佢唔會無啦啦搵個女人嚟搞，所以我覺得肯定無結果。」