溫拿巡唱連環跌到 陳友笑稱「真係撻成一塊」幸無受傷

溫拿早前喺廣州開騷時，鍾鎮濤不慎在台上跌倒，連帶想扶佢起身嘅陳友同葉智强連要跌。陳友今日同黎瑞恩齊為音樂劇《娛樂圈夫人》進行綵排，提到連環跌事件，陳友都話入行咁耐，未試過台上發生咁嘅意外，但睇片都覺得好笑，仲話今次真係「撻成一塊」。

陳友指自己平時有做運動，加上骨頭夠硬，所以無受傷。「當下最擔心會影響舞台劇，小恩子一嚟就問我有無事。每朝都會行山，上上落落都當運動。（落地唔傷，扶起阿B最傷？）我同佢繞手，佢滑住咁落，之後放軟晒手腳，強哥跟住朗拿度咁鏟埋嚟。啲朋友打嚟問候係擔心，但都話睇片忍唔住笑。」陳友表示聚人已經睇醫生檢查並證實無受傷，又笑稱以後要同強哥保持距離。「真係唔關阿B事，真係有油又有水。（你哋跌倒都繼續唱，好尊業。）the show must go on，我瞓喺地望住阿倫，佢仲繼續唱，個樣係『仲唔起身？』以前跣腳都試過，但未試過跌成咁。」

陳友同黎瑞恩嘅音樂劇將在12月舉行，今日第二次進行綵排，陳友不時忘詞，他笑言會用一個月惡補，而之前話好大壓力嘅黎瑞恩，表示已經放鬆不少。