【中餐廳】周冬雨對奶類過敏照飲自嘲似弱智　稱趙薇做「紅燒肉」

一致被網民認為同韓國綜藝節目《尹食堂》有九成相似、由黃曉明、趙薇、周冬雨、張亮演出的 《中餐廳》終於播出，節目中，負責做店長的趙薇在出發前先詢問各人的料理能力，周冬雨非常爽快話唔識。「但我有演過做菜的。」呢個神回覆真係……

一行人到達拍攝的餐廳後，周冬雨主動話要泡茶，結果將茶葉直接倒入電水煲當中，嚇得趙薇目定口呆，廚男張亮在旁打圓場表示：「可以清一清新茶壺的味道。」之後轉場去到超市入貨，周冬雨錯把糖漿當作是蜜糖，之後架手推車又唔小心撞到路人，搞到趙薇忍唔住出聲話佢：「你連車都推不好。」「我對你很失望。」對住呢位大前輩，其實周冬雨都只能選擇唔出聲。

而向來不拘小節的周冬雨，除在節目中透露自己因為6歲才戒奶，所以搞到連嘴巴都變形，又指自己其實對奶類過敏，雖然每次飲都會肚痾，但就從未戒過口。「我覺得是可以清腸胃，後來我覺得是弱智。」