伍樂城難忘與影帝級歌手合作：唯一一次拎金像獎最佳原創電影歌曲
撰文：張祖銘
出版：更新：
著名監製伍樂城（Ronald）創作過不少經典廣東歌，亦曾寫過不少電影主題曲，Ronald接受《香港01》訪問分享最難忘與那一位歌手合作，他表示：「我諗《無間道》係一個可一不可再嘅機會，梁朝偉同埋劉德華，都好彩嗰陣時有合照。嗰一首歌我覺得好適合佢哋唱，因為都係一套戲，所以好值得紀念。」
提到梁朝偉近年曾經表示對唱歌有恐懼，他表示：「我又唔覺喎！我幫佢錄音嘅時候佢之前已經係一個歌手，佢已經唱過歌出過唱片，過程我同佢就好順利，嗰陣時唔係淨係合作過無間道，有一套戲叫做《地下鐵》，佢同楊千嬅拍嘅，佢同楊千嬅合唱一首主題曲，咁其實我就同佢錄咗音兩次。」他繼續指曾經多次在音樂路上入圍金像獎，唯一奪獎的一次就是歌曲《無間道》勇奪最佳原創電影歌曲殊榮。