視帝放閃賀結婚周年卻被老婆爆成日鬧交　預告：七年之癢披荊斬棘

視帝陳展鵬與老婆單文柔昨日（13日）結婚6周年，兩夫妻更特登搵攝影師影靚相再加特效放閃，兩人分別跳入對方杯茶，以表示「You are my cup of tea」。陳展鵬發文說：「究竟你係我杯茶，定係我係你杯茶，其實有咩所謂？眨吓眼就六年，感恩這個階段，回味這些經歷，分享彼此感受，共同面對將來 2024/10/13」

即使隔住螢幕都覺得幸福，不過單文柔的版本就有點不同，慶祝之餘竟大爆兩公婆近來常常鬧交，她說：「6th Anniversary 🥂根據非正式統計😌發現每年嘅10月，都係事端特別多，決定特別多，爭吵特別多，今年都唔例外。慶幸，我哋今年最後可以好好一齊吃個晚飯！」她更標註陳展鵬並問他：「明年，踏入七年之癢，你有冇信心，披荊斬棘？ 🤭」相信只是耍花槍而已，因為她另一個Post都有講，陳展鵬有日早收工都立即去接自己放工，明顯超寵妻，難怪她冧爆謂：「兩個人生活就是儲一些小細節~話咁快就六年，願往後日子簡單。幸福🍀」相信兩位一定捱得過七年之癢！