黎愛蓮設靈｜Joe Junior透露離世前7天曾通話︰佢話冇乜事
撰文：吳子生
出版：更新：
梁小龍的混血歌手前妻黎愛蓮 （Irene Ryder）於9月1日於北區醫院安祥離世，享年75歲。喪禮今日（4/10）假九龍殯儀館地下德望堂設靈，並採用天主教儀式進行，讓親友作最後道別。
下午5時許Joe Junior兩夫婦抵達靈堂致哀。Joe Junior受訪時表示：「其實喺我15歲嘅時候已經認識佢，今年我到78歲，數一數我哋識咗63年。而我同佢其實都冇見十幾年，但不時都會電話聯絡，試過問佢點解唔出嚟唱歌表演，佢就話自己個心臟唔係咁好，話每次喺台上面，啲音樂嘭嘭聲嘅時候，個心唔舒服要坐低休息。其實喺佢走之前一個星期，我哋仲通過電話，當時我問佢身體點，佢答我話冇乜事，而我仲同佢講笑自己仲捱緊世界，佢仲笑我最緊要自己開心就得。點知一星期後就收到佢離世嘅消息，我係好難過。」