泳兒出席活動唔驚再遭網民批衣著求其 ：從來都唔會hea住做

泳兒早前出席音樂節目，以銀色tube top加闊身牛仔褲示人，就被網民留言狠批衣著打扮無taste：「身為一個出道18年嘅實力女歌手，著到出show係咪求其得濟？都40歲，係咪可以有taste 多啲？著到去蘭（蘭桂坊）咁」。

今日（30/9）泳兒現身黃竹坑出席海洋公園《哈囉喂·全園祭之厲鬼圍城》新聞發佈會。被問到今日一身打扮，會否擔心再遭網民批評？泳衣接受《香港01》訪問時大方表示：「咁又唔驚，因為我哋嘅團隊從來都唔會hea住做，無論出席任何嘅場合，大家都好花心思、同埋好用心去做，咁所以我就唔會擔心佢哋會講，因為我會出嚟澄清返。（衣著造型自己決定，還是公司？）其實兩方面都有嘅，團隊會俾啲衫我揀，試完之後，就會睇吓邊件啱，大家係有溝通。（有冇覺得網民乜都話一餐？）咁又冇嘅，因為做得藝人係要面對不同聲音，咁所以心態係好緊要。而我就冇嬲嘅，不過我就想維護返我嘅團隊，品牌同我自己，其實每樣嘢我哋都唔係求其去做。我指係想解釋返俾佢哋聽。」