【專訪】黃一山在港兩度成棄將　北上發展由夜場做起：膽都練大埋

當年在《笑星救地球》被打出名堂的「細龜」黃一山，是不少70、80後的集體回憶。在電影《逃學威龍》中飾演周星星好友「黃小龜」，願意被欺凌令他成了「周星馳的御用配角」。但不知由何時開始，細龜彷似完全消失於香港娛樂圈當中。這天在深圳的片場跟他做訪問，工作人員都稱他為山哥，畢竟北上發展15年，加上50有3，也真係沒有理由再叫他細龜，所以我稱他做細龜哥……

87年以編劇身份加入無綫的黃一山，因為節目《笑星救地球》與廖偉雄扮演的「乜太」合作而由職員合約轉入藝人合約，後來更做埋《娛樂新聞眼》主持。但隨着十分關照他的黎文卓離台，黃一山連傾續約的機會都無，成了棄將的他隨即加入有線兒童台，但隨着娛樂新聞台要用上一億資金成立，他成了節流下的犧牲品。「03年沙士、唔續約、細仔得3歲，都會諗個天唔通要絕我。剛好有人介紹我去廣州拍《功夫足球》，情況就好似在大海搵到水泡，雖然不知幾時到岸，但都拉住先。」就在沒有任何選擇的情況下，黃一山捉緊了這個水泡，在大海並不是飄浮了太長時間，又得到兩部劇集的邀請，腳步還沒站穩，但已安排老婆仔女北移，主要是內地賺錢香港消費非常唔襟計……原來當藝人紛紛北上賺人仔再回流香港置業時，也會有例外。

絕處逢生 夜場練大膽

雖說兩劇剛好解決了一年的生活費，但有錢唔通唔賺？尤其是內地的娛樂事業剛起飛，登台成了黃一山早期北上的收入來源。由於本身長駐內地，能省卻了一大筆交通費成了他的優勢，先由廣東地區做起，到後期往外省發展，一年20場到一年80場，黃一山以「爛做」去形容自己。「夜店登台好好搵，雖然會好雜，但做慣了就揮灑自如，一個藝人做到夜場job的話，所有演出都沒問題。那段時間學會了現場執生、練歌喉，甚至連個膽都練大埋，所以而家很多事情我都覺得好簡單。其實很多東西只要肯豁出去，就已經成功了一大半。」

黃一山的爛做令他慢慢有積蓄，亦令他明白不能死守。近年少接夜場騷，改做商演，主要是因為商演多數在中午舉行，就算是到外省，也能當天來回，「同埋我而家收貴咗嘛。哈哈！」對於仍要北上做夜場騷的港星，黃一山苦口婆心的表示：「一定要收訂，條數愈大，走數機會愈高。」自己也曾是苦主之一，唯有用阿Q精神安慰自己。「我唔係去賣貨，我只係帶自己去表演，頂多有少少紀念品，一百幾十元，訂又收咗，收唔到尾數就當作是賑災義演，人哋有心走你，你點會追到？所以心態一定要調整。」（上）