麥紫莉踩入書展谷寫真　10外籍保鑣護航：公司想保護我嘅安全

自稱準備下個月出發到日本拍AV嘅麥紫莉（Chili），今午在10名外籍保鑣的保護之下現身書展，唔知真係以為咩巨星嚟咗。Chili都話有啲受寵若驚，「因為篇報道出咗好多香港人都討論緊，公司都想保護返我嘅安全，始終書展都好多人。」現場所見大部份圍觀的都是男粉絲，而Chili現身時都好克制㗎！

講到Chili即將為ViuTV擔任清談節目主持人，她表示未知道詳情，「其實我最擔心自己嘅口才， 大家都知我口才唔係特別好，咁我希望多啲training。」講到ViuTV有好多較有話題性的節目例如《啪啪聲太好聽》，Chili就話自己都有睇，「我覺得係幾有趣嘅節目，其實我任何類型主持節目都可以接受。」提到日前有報道話原來佢最初想以歌手身份入行，而現時公司已安排她錄兩首歌，問到可否即場清唱幾句？Chili就面有難色，「吓，要練下先喎。」嗯……咁唯有等佢嗰兩首新歌推出喇！