陳曉華與朱敏瀚傳年底結婚：婚紗舖問我要唔要贊助

早前有報導指陳曉華將與朱敏瀚年底結婚，消息至今二人未有回應，今晚（25日）陳曉華出席劇集《金式森林》煞科即刻成為焦點，被問起朱敏瀚及結婚，陳曉華笑不停：「（妳年底結婚喎？）點會結婚呢？真係唔會結婚 ，假㗎。（但話妳同朱敏瀚年底結婚喎？）哎呀 直頭有人話我有咗BB添啦 （下？妳真係有咗？）我冇呀，真係冇呀，冇結婚冇BB ，（亦都冇拍拖？）拍完劇喇，啱啱，啱啱拍完劇囉，所以而家先至有閒情去理下身邊嘅事囉，（係咪玩神祕咁呀？）我有好消息就話畀大家知，冇呀，冇結婚呀，千祈唔好信呀，直頭有人呢，即係嗰啲婚紗舖頭問我，使唔使sponsor啲婚紗畀我呀，我冇呀，冇呀。（全世界都嚟恭喜妳喎？）係，但我都好開心，大家係咁恭喜我，我自己都好開心呀，（你屋企人咩反應？）我阿媽都知唔係呀，佢完全冇問我，最唔關心就係我屋企人！」