周慧敏無預警宣布唔再開演唱會：我覺得時候都差不多

周慧敏相隔7年再次舉行巡演，首站昨晚（31日）在澳門揭開序幕，由網上片段所見，呢位凍齡有術嘅「玉女掌門人」狀態大好。

不過喺個唱尾聲，周慧敏無預警宣布將唔再舉行演唱會，就令現場歌迷十分錯愕：「上一次巡演經常講到，人生每個唔同階段都有唔同追求，今次呢個巡演每場都係倒數階段，我準備完成咗呢個歷時唔知幾耐嘅旅程後，準備休息，所以今次會係我最後一次大型演唱會⋯⋯」

台下隨即有歌迷激動大叫「唔好」，但周慧敏十分冷靜，並續說：「因為我覺得時候都差不多，我要專注照顧好自己嘅身體，同埋照顧我嘅家庭，因為我啲貓仔都唔細，希望多啲時間陪我啲貓仔、我先生，我哋希望可以有更多共處嘅時間，我唔會唔工作，只係想有更多時間調節自己，你哋應該可以理解？」事實上，周慧敏亦曾在97年退隱，直至04年才復出，不過今次Vivian話只係唔開演唱會，工作依然如繼續，粉絲都仲有機會見到佢。