方健儀開新頻道尋人搵嘉賓 與「網友」聚會真身交流

方健儀日前出席本地護膚品牌「日月星辰」發佈會，分享使用品牌心得。她笑指「全職炒散」即將十周年，護膚、美容比當年做主播更為着緊：「以前淨係掛住報新聞，邊有時間護膚？反而自由身後有時間『錫』吓自己啲皮膚，仲不時有客戶贊助，靚咗之餘仲慳翻唔少添！」

雖然自由身工作，但方健儀比以前更忙碌，諗頭多多嘅佢仲預告「大茶飯」：「嚟緊我會做新嘅訪談頻道，要觀眾睇完有激勵、鼓勵作用嘅，嘉賓會以大家熟悉為主， 依家好似方東昇咁樣『尋人』，希望搵到好嘅嘉賓同大家見面。」

提到「自由身」十周年，方健儀仲搞聚會同支持者見面：「啱啱我都搞咗個『網友聚會」，我唔敢講係『粉絲』，因為我唔係一個偶像，亦唔想同佢哋有高低之分，大家聚埋一齊整烏冬，成個氣氛真係好開心，老友記、年青人都參加，其實我一直對搞呢啲活動都冇乜信心，但係原來老、中、青嘅觀眾都比到啲信心我，所以決定用『真身』同大家交流。」