當奴預告將舉行903籃球賽　森美想同老婆日日打羽毛球

商台65周年台慶，昨晚喺尖沙咀酒店延開30席，主席何驥、行政總裁陳靜嫻、首席智囊陳志雲以及一眾DJ均悉心打扮出席。森美與當奴齊以假髮示人，但當奴由於假髮「離罩」，令他做訪問時笑料百出。

當奴接受訪問時率先透露將會舉行903 AllStar 籃球賽，森美笑稱上屆因姜濤受傷而留手，希望對方今次能以最佳狀態上陣。提到明星隊陣容，當奴表示：「而家係明星多過DJ 3倍以上，我哋都即搵張繼聰，佢入903隊都幾反感，所以佢應該去歌星隊。」

森美笑言DJ隊全部年過40，為咗大家開心會拼命，會拎定救心丸。而除籃球賽外，森美亦表示想搞羽毛球賽，仲話羽毛球對男人好重要。「我頭先先同太太打完，我哋唔係友誼，職業㗎。（通常幾耐打一場？）我當然想日日打，但難book場，太太都配合嘅。」