鼎爺做老闆開私房菜　阿爺真係入廚房炒俾你食？

TVB十點半由袁偉豪同楊明做嘅《打工捱世界》今晚就會播完，之後就會由強勢回歸嘅《阿爺廚房》頂上，上季好評如潮，帶起咗成個「懷舊粵菜」風潮，所以今次Season2食住個勢會加多10集，30集入面會教大家煮九十幾道唔同嘅菜式，咪即係一日教成3個餸，咁都好Chur喎！但鼎爺（李家鼎）就話大台未有加人工，反而拍檔譚玉瑛因為啱啱續約而有得加人工，鼎爺都抽水講：「你就好命啦，我真係命苦！」

鼎爺煮嘢食手勢咁好又邊苦呢，嚟緊9月佢喺銅鑼灣樓上鋪嘅私房菜就會開張，「本身就8月開嘅，但因為裝修問題所以要9月，個裝修真係靚到你唔信！」我信架，聽講呢間私房菜投資過千萬，老闆之一嘅鼎爺仲會親自巡舖：「我一個禮拜會落舖3、4日到，唔係長駐喺度，始終都係以TVB為主，如果有朋友嚟嘅我會親自煮。」唔係鼎爺嘅朋友都唔駛擔心，佢話如果有緣的話佢有時都會落場煮嘅，「我係行政總廚嚟，啲餸都係我同另外一個廚師設計，《阿爺廚房》入面嘅餸會有，入面未見過嘅都會有，總之就咩都有得食啦！」今次「鼎爺私房菜」係鼎爺嘅第一炮，會唔會再開多幾間分店就睇大家夠唔夠捧場喇！