【不服來辯】香港無人理MCJin？　農夫先係將HipHop帶入屋代表

MCJin在香港紅唔起，似乎已經成為了近期網上熱討的話題。一個在美國HipHop界以rap成名的小子，回流香港出過幾隻HipHop碟，拍過幾套電視劇，又做過維他檸檬茶廣告，其實以入屋程度來說都已經算是成功。但大家覺得他在美國是一個用rap去rap贏黑人的華人，來到香港卻變成三不像一般，rap無乜得點發揮，自然不能將HipHop發揚光大，拍劇也不算是很成功，在《潛行狙擊》中做楊立青算是比較突出的一個角色。如果以一個外國出晒名的rapper都未能夠在香港發展HipHop，難道香港的HipHop界真係只可以有underground，唔可以入屋？

回想一下以前以HipHop做招徠的歌手，要數最出名一定要數LMF這隊組合，當時初出道以粗口歌詞成為最大賣點，當然有人支持有人反對。支持的人會認為他們這些歌是當時年青人的文化和態度，以及對社會的控訴，所以先會以粗口寫歌詞。反對的人當然會覺得粗口教壞人，而且因為LMF的歌有不少是鬧政府，亦惹來一堆衛道之士的反對。要講rap粗口一定唔可以唔提KZ，相信平時有聽開香港HipHop嘅朋友一定有聽過佢嘅歌，很多人都讚他的填詞功力之高實在罕見，佢有好多鬧得好兇狠嘅歌，不過最深印象，都係「佢家吓黃色衫，又變返著綠色衫。」真係妙到毫巔。

不過粗口你又點可以令佢入屋？當年LMF憑大懶堂一歌令他們獲得叱吒樂壇我最喜愛組合獎金獎，成隻歌一粒粗口都無架！講到尾，你要將HipHop在香港這個比較保守的市場全面推廣，粗口一定唔使諗。所以話，要講將HipHop最成功帶入屋一定係農夫，其實佢地早期都有唔少作品以諷刺手法去講香港情況，例如《港人自講》、《十七年華》等。自從轉咗去陳冠希間公司之後就開始製作一些輕鬆正面的HipHop歌，開始成為樂壇頒獎禮的常客，《456Wing》、《舉高隻手》、《風生水起》等等歌曲都大把人聽過，佢地少了諷刺時弊，多咗共鳴人生，例如《偉大航道》、《好彩分手》、《返老還童》等等，這些歌你聽完未必會好激昂，但會有一種沉澱，因為佢哋可能就係唱緊你嘅人生。雖然有人批評佢哋數白欖、商業化、失去HipHop意義，但無可否認香港人已經接受農夫有自己風格的HipHop歌，唔一定要粗口，唔一定要鬧人，原來正面、鼓勵嘅HipHop係可以在香港立足。

咁究竟農夫仲算唔算HipHop文化？定佢哋已經商業化咗？其實在農夫早期歌曲《菩提本無異》中已經講過這個話題，其中有一句歌詞係：「咁如果佢賣到好Pop呢，咁佢仲係咪HipHop呀？」咁賣得同埋入屋係咪就唔可以係HipHop？唔通HipHop一定要underground咩？HipHop當年在美國形成的時時候，其實就係一種結合了黑人的語言、音樂、舞蹈等等多種元素組成的文化，範疇太大，我地集中講HipHop歌部分，HipHop同Rapping，就是一種帶有節奏與押韻的說唱方式，難道農夫的歌不是這樣嗎？正如上文所言，其實佢哋只係以自己的風格繼續HipHop呢條路，亦成功將呢一種HipHop帶入屋。