香港有嘻哈？ Mastamic：Hip-hop板仔裝就有Hit過！
中國音樂節目《中國有嘻哈》近期可謂彈起，吳亦凡口頭禪一句「你有Freestyle嗎」帶起整個節目，將Hip-hop饒舌音樂重新帶到大家眼前，先不談他們的選秀方式是否合適，又或者評判們夠不夠資格，有人提起總好過無人記得起。怎麼說呢，你又有沒有想起香港有哪些Hip-hop歌手呢？陳冠希？MC仁？LMF？對上一次你聽香港Hip-hop歌是什麼時候？
香港的Hip-hop音樂是否沒落呢？饒舌界的「MastaMic（唐崇政）」有自己特別的一套看法：「其實香港從來就冇紅過Hip-hop，你話陳冠希、農夫、LMF嗰啲只係紅個歌手自己，根本Hip-hop音樂就冇Hit過。Hip-hop板仔服裝就真係有Hit過，嗰陣人人都著Oversized嘅衫，一街都係。」聽起來又覺得頭頭是道，好像那時候是因為那個歌手才去聽他的Hip-hop歌，但他們沒唱之後，就沒有再特別去聽Hip-hop音樂。
香港Rapper大家又會記起哪個？
到底Hip-hop音樂在香港出了什麼問題？「其實係大家都唔識鑑賞，會唔知到底喺度唱緊乜，韓國音樂好多都係Hip-hop底，可能大家唔覺，到底點解香港人會聽K-pop又唔聽本地嘅Hip-hop呢？呢個係一個好深奧嘅問題，我自己覺得可能係造型方面，好似韓國BIGBANG咁，Hip-hop歌只係佔3成，但GD（G-Dragon）自己Solo出咗隻碟，裡面全部都係Rap嘅歌，可能係包裝得好，紅咗就自然會好多人聽。」MastaMic澄清自己不是貶低K-pop，又提到在《America's Got Talent》（譯：《全美一叮》）這類選秀節目中亦很少人拿Hip-hop音樂去表演，皆因大家都不懂怎麼評賞這類音樂，不講遠的，就談我們自己香港，在音樂頒獎典禮或者其他大型的音樂節目裡，也甚少看到Hip-hop的出現，偶爾有一對組合農夫閃過，但然後就真的沒了。
而其實尹光式甚至大台經常出現的所謂一齊rap，都只是「數白欖」式的出現，要知道「數白欖」與「Hip-hop」差之毫釐，謬以千里！MastaMic細心解釋：「數白欖同Rap係兩件事，數白欖通常都係3、5、7字句，有句字限制，而且好少有Multisyllabic rhyme，通常都係押最尾嗰一個字，個Flow又好局限變化少，相反Rap就節奏段落比較多，句字亦都可以用唔同數字，個Beat又可以自己揀，你聽過就知真係唔同好多。」他最後提出一個假設，嘗試解釋為什麼Hip-hop在香港紅不起：「其實真係好難解釋，但我估咋，我覺得可能因為香港以前係英國嘅殖民地，受到搖滾文化影響，大家都偏向鍾意聽Beatles嗰類嘅歌，所以香港人都係鍾意聽結他，重旋律嘅歌，反而少聽節奏類型的。」