黃秋生fb揞名鬧有人「真係唔怕面懵」 王晶急回：兩個乞丐！
王晶同黃秋生的恩恩怨怨一直都冇停過，兩人舌劍唇槍隨時好睇過連續劇。昨日淩晨秋生突然喪鬧「王老吉」，鬧的當然不是涼茶牌子，而是某人的花名，仲火到粗口橫飛，隔住個Mon都feel到火藥味。
秋生在文中大罵對方當年在自己生病的時候落井下石，讓導演劉偉強和監製兼編劇文雋開戲時飛起他：「屎X鬼！部戲關你X事咩？嘉禾嘅，你架（㗎）？仲有，乜原來啲頭髮同長鬚係你加嘅咩？原著漫畫你畫㗎？X碌！真係唔怕面懵。」
王晶對號入座？
雖然成段都冇開過名，但見到個「王」，本來都仲係估下估下，點知又有人真的「對號入座」。曾經單方面表示unfriend秋生的王晶今日突然在他的「樹洞」微博發洩，內容一樣冇開名㗎，就話：「香港娛樂圈有兩個口賤之人，因口賤引致前途盡毀。我不齒二人所為，割蓆（席）絕交。」被王晶絕交的人嘛，大家心照啦。
睇埋落去：「最近二人也許實在沒法過日子了，接點本地小活。就在漢奸傳媒大肆宣傳，拚命罵我，希望我跟他們撕B，就能收宣傳之效。我一笑置之。朋友替我不值。我說：『街上有兩個乞丐罵你，你會跟他吵嗎？』」剛好秋生最近孖住林海峰宣傳舞台劇《搞大電影》，王晶所指何人，呼之欲出。
不約而同地秋生早前接受《香港01》記者訪問時亦有講到「乞丐」這個話題，提到劇中會大爆娛樂圈秘史時，其中一段秋生話劇中的對白令自己想起某人：「有句等全世界個個有飯食，唔使佢哋做乞兒，佢就真係咁諗，佢令全世界個個有飯食，但佢覺得你係乞兒嚟，你唔食我飯就做乞兒。」看來王晶鬧人「乞丐」應該有前科。
杜汶澤躺着也中槍
不過王晶一直都講「兩個人」，最後仲要話人哋係「兩個乞丐」，網民估計他所指的一個是秋生，另一個是同樣因佔中被王晶unfriend的杜汶澤。但阿澤就完全無動於衷，還在Facebook上載煮嘢食心得，秋生同王晶隔空開晒火，一人鬧一句當打和，但阿澤今次無啦啦中槍就最無辜喇。