【獨家．降魔的番外篇】黃建東吊威也勁騰雞　自嘲肥到好似相撲手

拍足3個多月的《降魔的番外篇-首部曲》終於去到尾聲，繼上次噴雪大場面之後，這日講述兩位男主角黃建東同楊潮凱要大戰張曦雯。雖則話有CG效果，但吊威也呢家嘢都無得偷雞。正式拍攝前，黃建東頻頻與武指研究落地位置，十分認真。

《番外篇》每集只有5分鐘，但這場威也戲拍足大半日，不過對自認細膽的黃建東來說已經係極限大挑戰。「頭先威也飛起時，導演全部都話好，因為我堅驚，所以表情最自然。」而講到是日一身裝扮，黃建東話事前都有搵健身教練操一操。「因為劇情講鄧佩儀將我同潮凱轉移，但她只轉走了人，轉唔走啲衫，所以變成全裸，頭先睇playback，我好似相撲手咁，拍完之後真係要去減肥。因為今朝一早就開工，好難唔食嘢，但頭先吊威也時，成個乾炒牛河好似會出返嚟咁。」

其實兩人同吊燒豬無咩分別……黃建東頻頻撞地，真係好慘豬。