鍾樹根自拍水光槍美容變KOL？　電競女神Rose Ma：政客扮貼地方法

被網民戲稱為「Tree根」的鍾樹根自從在區議會同立法會相繼落選之後，大家就少咗好多機會接觸佢，好彩Tree根自知其精僻用語「深得民心」，沒有因為離開政壇而離棄網民，不時在Facebook page分享日常生活。而最新的一個post就勁喇！Tree根冇見一排居然榮陞咗做KOL，走去學人做Facial打水光槍！

Tree根在Facebook鋪了3張接受治療的相，仲好鬼專業咁講埋做嘅時候打咗幾多槍，又話：「農民唔易做，日曬雨淋，最傷就係的皮膚...... 唉！都係要做番個 treatment 先 .... #水光槍 #全面護理 #hEGF + #FGF #皮膚靚番哂 #回復青春 #後生廿年」霎眼睇，似十足KOL的美容廣告。

《香港01》記者致電「真．網紅」兼模特兒Rose Ma，談起今時今日居然連政客都踩過界撈埋KOL個份，她表示一早睇過個Post：「好明顯就係背後啲公關嘅功勞。」身為電競女神嘅佢，講嘢果然超級直接，仲繼續話：「都係啲政客扮貼地嘅方法嚟啫。」不過方法都有分好同壞，Tree根做美容KOL究竟適唔適合？馬馬諗咗一陣就係話：「如果講個年紀反而唔係問題，或者會因為佢個年紀而更有效果，同埋男人會更有Gimmick。」

馬馬似乎都係啲鍾意「反差萌」嘅人，如果Tree根要繼續係KOL依行發展，馬馬覺得有咩廣告啱佢呢？她就笑言要接就接搞笑類：「好似快餐店咁，香港人咁忙，快餐店夠快夠平夠貼地！」雖然馬馬咁講，但小編就有啲擔心Tree根會唔會好似林鄭唔識港鐵入閘咁，唔知點喺快餐店落單拎餐㗎……