一提黃心穎即落閘 黃心美：唔想你哋對待佢好似呼吸都錯

陳俞希、黃心美、劉明軒、孫慧雪主持ViuTV新節目《美麗四十路》，心美接受訪問時，笑指當初監製搵佢時，曾誤以為對方係搵佢做參賽者。「佢搵時係爸爸走咗，嗰時手袖長期都係鼻涕同眼淚，好需要啲嘢令自己分散注意力。」

問到會否擔心公布主持人選後，會引來爭議，陳俞希即時幫口，話節目有4位主持，大家可以分擔，而自己亦樂意做美心背後強大嘅後盾。而心美亦話唔擔心，並謂自己都再生活同工作，又反問記者會有咩負面評價。陳俞希再幫手解圍，指參賽者十分有水準，所以有信心大家擺啱焦點。

黃心美指事前有同妹妹黃心穎溝通，並謂：「爸爸走咗之後，我做過一個專訪，已經講晒我想講嘅嘢，我以後都唔會再答關係任何我妹嘅嘢，就算咩都好，我唔想再答啦。我move on，希望你哋都move on，我知佢做錯，但唔想你哋對待佢好似呼吸都錯，我真係唔答㗎啦。」

另外，提到舊愛馬桂峰與Kayan9896戀情，心美表示已經無同對方聯絡，但依然會送上祝福，亦希望對方會開心同幸福，而自己目前單身，對於愛情十分隨緣。