黎明是但噏慶回歸　小春︰真係唔夠佢嚟　張智霖︰今日學到好多嘢

今年七‧一周圍都有回歸Show，其中一個就有黎明、張智霖同陳小春一齊在中環海濱活動空間舉行《開心幸運里》活動，而三位就以「幸運輪唱團」之名上台獻唱懷舊金曲。
近年大家鍾意聽Leon講嘢多過唱歌，因為每次都有新鮮爆笑口感。今次回歸Show，可能氣氛夠熱烈，而且又返到自己呢個中環主場，同小春Chilam閒談時下下爆Seed，搞到兩位完全接唔住，只好苦笑！

又流行經典50年？

這次音樂會，三人以香港的經典金曲為主題，唱盡前輩們的作品，所以音樂會一來，先以林子祥膾炙人口的歌曲《三人行》作開場，Chilam 先單獨出場，緊接小春，最後有Leon。為貫徹親民主題，三人以輕鬆造型現身。雖然昨晚曾一度落大雨，但天公造美，一開場即停雨，三人亦感謝觀眾沒有因大雨而離開。

接住由Leon 獻唱陳百強的《有了你》及《深愛著你》，作為向一代巨星致敬。Leon又提到小時候到清水灣，經常見到好多大哥哥，車內的收音機經常播住這首《有了你》，同一時間，他邊講邊行到身後的鋼琴坐下「自彈自唱」，當觀眾放聲尖叫時， Leon突然自爆︰「我只是扮嘢！」真係畀佢玩透，不過現場所見，真係似模似樣，呃到下人。

小春幫囝囝補祝生日︰Leon︰「小朋友冇乜時間觀念」

講完唱歌，到番正題「講嘢」，當晚Leon心情大好，歌與歌之間勁多分享，但就因為太好笑，眼見陳小春同張智霖都有點難招架。話說小春先多謝黎明邀請他來唱這個Show，雖然自己個仔生日都不介意，但Leon就秒速回應︰「咁細個，冇乜時間觀念嘅！」

到張智霖上台，因為他是在二人合唱《友情歲月》時中間插入，Leon便追問他何解咁遲？Chilam發揮搞笑精神，食住小春個話題，話因為媽媽又係今日生日，所以剛才在後台致電祝賀先遲上台，但斷想不到Leon連咁又接到︰「係，因為伯母嘛，所以好有時間觀念。」唔知頭唔知路的Chilam，一臉無奈暗說︰「等我諗下先……呀係喎！（扮諗得通）」

去到最後，小春表示今次玩得好開心，跟Leon說下次再有這些機會一定要預他，Leon爽快答應話好，不過仲有下句︰「下次一於將人生一啲開心同唔開心嘅事延長，變成舞台劇同大家分享一次，譬如我扮記者，你打我。」這個殺著，搞到小春措手不及，只好苦笑地答︰「我唔興㗎喇！而家，我唔興㗎喇！」不過Leon都好好人，幫小春兜番︰「有時記者朋友都有錯，不過搵食啫，但千祈唔好持住搵食係一道聖旨。」又一句金句，令在旁的Chilam都忍不住歎句︰「我今日學到好多嘢呀Leon！」聽落似一則戲言，但Leon都認真回︰「大家Share下啫！」以為認真便輸了？Leon認真便全勝了！