【娛樂回歸20年】無綫冇人接捧？　亞視葉家寶：停留黃金年代餘暉

回歸20年，電視生態起了翻天覆地變化，煲劇已經不再侷限於睇電視，上網追劇已經成為新常態，但劇集質素好壞，講到尾還是要有好演員，在97年前，無綫亞視競爭激烈，而今天除了無綫外，還有ViuTV及奇妙電視，但叫得出名字的演員，來來去去還是那一班80年代舊人。亞視的老臣子，曾一手策劃亞洲小姐選舉，仿如亞視icon的前亞視執董及高級副總裁葉家寶，最為人熟悉是他跟亞視共存亡，從未有跳船打算，但亞視欠薪偏偏他卻要上身，最後罪成被罰款15萬，別人不仁，他卻從未有不義，至今仍為亞視講盡好話，尤其是為已過檔無綫的一班亞視舊將。

扭開電視不難發現，好像在看當年的亞視，《不懂撒嬌的女人》跑出了游生袁文傑，《親親我好媽》看到江美儀，《老表》系列有萬綺雯，而亞視出身的田蕊妮更贏得無綫台慶頒獎禮的視后。葉家寶表示：「以前就話亞視嘅人叫唔出名，依家佢哋自己栽培嘅人都叫唔出名，反而亞視嘅去晒佢嗰度，好似萬綺雯、袁文傑咁，都冇新一批人接力。我哋仲係停留緊當年黃金年代嘅餘暉，睇緊80年代嗰班人，好似冇新人咁，內地有小鮮肉、小花旦，但我哋啲新人又捧唔起，劇集重播反而成為要追嘅嘢，新嘅嘢唔會睇囉，自己睇返都覺得幾可悲。」

葉家寶說現在的新演員，沒有多少磨練的空間就要上戰場，「內地劇、歐美劇嘅演員，都係科班出身，真係受過好專業嘅培訓，睇返香港後生嗰班嘅演技，真係要磨練下，劉德華、三哥苗僑偉嘅五虎都經歷咗好耐，觀眾先接受，或者要等到好劇本好角色先至出到嚟，但依家係唔會花時間去慢慢培養一個人。若然要俾新人孭套劇，你又冇信心喎，惟有俾舊人帶住去做，但蚊蚊(萬綺雯)都係一年拍一套劇，搵舊人救亡救得幾多套？以前歡樂今宵係少林寺，依家冇咗之後，節目咪得返旅遊飲食，變咗好單一囉。(綠葉配角都係同一班人？)係呀，睇到精神都分裂呀，啱啱睇完呢套做一個角色，下一套又見返佢喎，成日話TVB藝人好多，但數嚟數去又係得返嗰班。演員流失係事實，係香港拍劇辛苦，人工又唔高，不如返內地拍啦。現時係人才冇，內容又唔得，電視界咪變到一潭死水囉。」

亞視在97年前確實有過輝煌歲月，但自從回歸後，內地商家入主，整個營運模式也改變了，最重要是自家製作的劇集買少見少，在結業前的數年，更要反覆播出舊劇，而亞視的死因亦被歸咎於欠缺具水準的劇集留客。葉家寶無奈道：「我都成日問自己，電視係咪一定要有劇呢？好多人都有唔同嘅睇法，但我認為一定要有具代表性嘅藝人，點解呢？劇係可以留到好多藝人，而好多藝人係鍾意演戲嘅，好嘅角色先可以深入民心，而呢班藝人就成為咗你個台嘅icon，觀眾咪會去追囉，追佢哋嘅新聞，追佢哋嘅劇，慢慢對你嘅台嘅關注度高咗，呢樣嘢有劇係幫到嘅。」葉家寶續道：「但係《今日睇真D》都好多人追，都唔係劇嚟，一樣捧到一啲藝人出嚟，大姐明(林建明)、區錦棠、何B(何守信)，好鮮明捧到一啲藝人，有佢哋嘅地位，所以最緊要有好嘅節目俾觀眾睇。」葉家寶講中要點，好演員與好劇本是相輔相成，但今天流水作業，膠劇充斥的年代，要看具水準的劇集，睇網劇罷啦。