【娛樂回歸20年】內地劇進駐無綫黃金檔？曾醒明：自家製作無少到

回歸20年，對師奶觀眾來說，可能沒有太大感覺，關埋門睇電視，忘記了外間的風風雨雨，安坐家中扭開電視，才驟然發現很多事也在悄悄改變，7點《三生三世十里桃花》、7點半《射鵰英雄傳》，全是購自內地的電視劇，還算是香港人的電視節目嗎？誠然無綫亦有本地製作，包括10年前的《蘭花劫》、王晶出品的《賭城群英會》，但這些倉底劇及膠劇，卻仿如一直在挑戰觀眾的底線，至於備受讚賞，近期較優質的劇集卻是中港合作的《踩過界》，明顯地已經出現一個新的電視生態。

對於《蘭花劫》被網民批評是倉底劇，前無綫傳訊部宣傳科副總監曾醒明亦有耳聞，他接受《香港01》訪問，解釋了無綫播出10年前倉底劇的原因，「其實《蘭花劫》只係一個單一嘅嘗試，我覺得佢哋咁樣編排，係既然都係自己製作，不如用來試驗下觀眾口味，究竟可唔可以接受得到？今次個試驗好明顯係唔成功啦，雖然外邊評價除咗演員個樣冇乜點變，佢哋嘅演技亦都係受到讚賞嘅。(有人批評啲CG好似好假？)係呀，問題係啲製作呀、CG呀，就會覺得兒戲啲囉。口碑同收視都唔成功，相信經過呢一役，佢哋唔會再拎啲陳年舊貨出嚟。」

近年無綫在7時後的黃金檔，接而連三播出外購劇，先後有《瑯琊榜》、《錦繡未央》、《三生三世十里桃花》、《射鵰英雄傳》，姑勿論內地劇集是否好看，質素如何，但作為本地觀眾，卻要看大部分是內地演員的劇集，親切感已經蕩然無存。曾醒明表示其實是一次美麗的誤會，「兩地電視節目交流一向都有，但近期會多啲，因為開拓咗7點嗰個時段之後，《三生三世》半小時，跟住到《射鵰》一個鐘，感覺咪多咗囉。但其實本地製作係冇少到，每年最少600小時自家製作，唔會因為同大陸買劇而少咗製作。」

曾醒明透露近年的劇集，或許會多了中港題材，但卻絕不是專登迎合內地觀眾的口味，他以《不懂撒嬌的女人》作例子，「呢齣劇原本係同愛奇藝合作，但唔成功啦，覺得呢個題材，大家都講咗好耐，所以最後揀咗《踩過界》。但《不懂撒嬌》裡面嘅香港人角色，係要去到內地發展，例如工作上要去內地，咁自然有內地嘅背景。如果多咗中港融合嘅劇集，外景嘅性質亦自然會多咗，但唔係為迎合內地。」事實上本地觀眾對本土製作，始終有一份情意結，增加自家製作，才能真正留住觀眾的心。