【任噏樂評】當Linkin Park變成6個中佬 跌入電音的無底陷阱
事隔3年，Linkin Park上個月終於出咗第7隻碟《One More Light》。仲記得年頭首先派咗首《Heavy》，搵咗唱電音女歌手Kiiara合唱。當初呢首歌一出，似乎震驚咗唔少樂迷（未至於60億人），因為音樂一起嗰刻，連埋女聲，一度以為自己聽緊呢期玩電音出晒名嘅The Chainsmokers。之後緊接派台《Battle Symphony》、《Good Goodbye》，歌路都係大同小異，走唔甩EDM。喺而家電音開始成為主流年代，真心講，同類型嘅歌手、樂隊多到真係唔知揀邊隊聽好。所以有唔少Linkin Park樂迷再次失望，眼見隊band嘅熱血似乎冇晒，連主音Chester好似唔想再力竭聲嘶……呢種心情帶到直到正式出碟。筆者聽咗兩日，都思疑究竟當年有Nu-Metal第一天團之稱嘅Linkin Park，轉型轉到咁，其實係咪一種錯。
喺Linkin Park身上，好似睇到佢哋嘅人生態度。一隊唱Nu-Metal唱到有新境界嘅Band，初出道先廿幾歲，Chester先會咁有活力同你嗌到黐肺，得閒唱下對社會嘅控訴，講下做後生仔有咩壓力，一路唱一路成長。佢哋慢慢回歸平靜，將當初嘅稜角慢慢磨平，走向電音、Pop路線，出現呢隻碟…係人生態度嘅一個縮影。由《Minutes to Midnight》開始，轉化成人生導向，幾個熱血青年全部變晒中佬，好啦就同唱下信望愛，行下治癒路線，反正而家都hit。
只不過無可避免嘅係，當電子音樂逐漸演化成主流，近年已經有唔少同類型音樂嶄露頭角，Bebe Rexha、Alan Walker，仲有好紅嘅The Chainsmokers等等，都數唔晒。電子音樂嘅潮流，已經唔再係一味靠旋律洗腦吸引聽眾，好似玩花式咁複雜，建立鮮明風格簡直難到核爆。
以前Linkin Park能夠脫穎而出，因為隊隊Nu-Metal band都爆晒粗、又玩血腥，偏偏佢哋就又pure又true，竟然忍到口冇首歌有粗口，加上主音Chester亦剛亦柔嘅聲底，真心唔唱Metal都大把嘢玩，有性格有風格，喺當時一大焦點。反觀而家，有晒主題係唔錯，用歌詞療癒下人心，ok fine。可惜聽完10首歌之後，10首歌唔入腦，難以辨識為屬於Linkin Park嘅電音，有啲捉到鹿唔識脫角，捉住個趨勢但又冇咩變化，明明有個DJ（Joe Hahn）喺度，偏偏冇乜發揮。唯有單純以耐聽度，覺得成隻碟最好聽係《Heavy》同《One More Light》。始終聽同類型嘅歌，實在有太多選擇，作為放棄為Linkin Park有任何變化而掙扎嘅Fans覺得，如果轉型要成功，睇怕仲有段日子咁囉。