鄧萃雯重返無綫　四奶奶再拍劇拒接地獄通告

自杜之克回歸TVB掌舵後，陸續傳出前輩級演員會回巢的好消息，近日再有傳下一位返娘家的藝人就是鄧萃雯，據知今次打動雯女的，就是和她合作無間的著名編劇陳寶華。陳寶華的作品包括《十月初五的月光》、《真情》、《妙手仁心II》，她在TVB最後一套劇《Loving You》更是由雯女做主角。

據知雯女已經等緊睇劇本，更放言返TVB拍劇只有一個條件，就係有覺好瞓。雯女早年拍多TVB多部佳作，最為人熟悉的角色一定是《巾幗梟雄》的四奶奶和《金枝慾孽》的如妃，但現在雯女已年過半百，實在難以承受TVB的「地獄通告」。雯女更講到明話：「我人生階段已經唔一樣，唔係我唔肯捱，而係身體捱唔住。」她坦言在《金枝慾孽2》時身體已經出現警號，可以為了港劇和興趣，甚至為了寶華姐而拍劇，但充足的睡眠對一個人來說實在太重要：「依幾年我休息咗好多，係因為我對自己身體好慚愧，一直都只係用佢冇關心過佢。」

TVB的「地獄通告」叫得做地獄大家都明咩事，之前馬國明拍攝《深宮計》拍足27.5小時，陳展鵬拍《天命》更連續53小時通頂。雯女期望再次回到TVB的話，可以每天只工作12-13小時，這個條件之前張衛健《大帥哥》也開過，而他已經落實拍劇，宣萱在宣傳《不懂撒嬌的女人》時，更公開召喚古天樂，笑言：「古仔依家唔同㗎喇，有得瞓覺㗎喇！」睇嚟呢家TVB都開竅，明白睡覺對藝人的重要性。

今次新劇算是寶華姐送給無綫的50歲生日禮物，所以而酬勞方面毫不計較，還度定劇本想請雯女回來坐陣。寶華姐腦海中概思的劇是以「多功能老婆」為題材，一種由社會、環境逼成的萬能女性，題材內地實行的話大概會被「曲解」，反而香港的創作自由度較大，據知寶華姐鎖定女主角由雯女擔當，男主角則希望是吳鎮宇。之前雯女拍《師奶兵團》時做過人阿媽，唔知今次做最強人妻會唔會同宣萱的「Mall姐」一樣得到好嘅好口碑呢？