【專訪】挑戰港鐵霸權劉卓軒繼續唱　組樂隊「未能接通」唱出世界

當你有急事搵朋友，點知Whatsapp佢就「已讀不回」，打畀佢又「未能接通」，你會點做先？一係忍佢，一係絕交。如果你選擇絕交，咁你分分鐘就會冇咗隊Band。好彩主音Hinry、結他手KK同Bass手Rocky同鼓手阿Fing互相包容，今日先會有樂隊「未能接通」。樂隊「未能接通」歌曲主打Jazz Funk風格，係咪反映咗隊中各人性格都隨心而行呢？

前地政署職員「挑機」過後轉行夾Band？

大家對「未能接通」可能感到陌生，不過應該一早就認識主音Hinry劉卓軒，因為他是2年前於觀塘站Busking，被網民稱作一句KO港鐵職員的前地政署職員。回望被網民稱為「挑機」的事件，Hinry自言冇乜特別感覺：「我busking四年，差唔多每個禮拜都發生，只係嗰次俾人拍片放咗上網。重覆嘅對白都講咗上百次，所以你都見到我面不改容。」除了「前地政署職員」的身份，Hinry亦是《中國好聲音》第三季香港區海選冠軍，Hinry承認這些身份起了「直線宣傳」的效果，不過大多訪問都是圍繞地契的問題，未有令出Show機會「直線上升」。

點解隊Band會叫「未能接通」？

一隊Band會叫「未能接通」皆因每位成員都「神龍見首不見尾」，Hinry、KK同Rocky異口同聲說：「長期未能接通嘅係阿Fing！」Hinry再補充話：「阿Fing平時出出騷係搵唔到佢，搞到我哋3個好驚！試過11點出騷，阿Fing 9點話起咗身，點知到11點都搵唔到佢，連搞手都問我『你個鼓手喺邊』！」

不過結他手KK的神隱程度也不遑多讓，隊中各人形容他「永遠唔理正經嘢」，Rocky表示：「每次都要喺Whatsapp group講無聊嘢引佢應機，就算係叫佢睇《暫時未能接通》MV rough cut都要咁！」

嫌睇文字唔夠，睇埋個MV大家就會明「未能接通」點嚟，同埋一開頭嗰段電話錄音係真㗎！

「隨心就是皇道」，初次齊人見面就寫歌參賽仲攞埋獎？

雖然「未能接通」各人經常「神隱」，不過一攞起樂器埋位就會見真章，這種化學作用就夾Band最大的樂趣。《Wednesday Night》一曲對他們來說別具意義，Hinry憶述：「嗰陣第一次齊人見面，就諗住不如報個比賽玩，而個比賽當晚11點59分就截止，我哋嗰晚8點都未開波仲傾緊偈。之後就用咗3個鐘時間由零開始做好晒曲、詞、編，所以成件事好Organic，最後喺個比賽攞到第3名。」

由此可見「未能接通」4人密契十足，Hinry以「拍拖」去形容大家的關係：「我覺得大家都成長咗好多，性格要互相磨合，其實每個人都同另外3個人拍拖真係好唔容易，雖然會鬧交quit group做下樣，不過都冇試過話要散Band。」

除此之外，Hinry覺得隊中有女成員可以起到「中和」的作用，如果全男或全女是非會比較多。未能接通已經「進化」到，主音Hinry隨意哼出一段旋律，KK能用結他彈出那段旋律並作為新歌的骨幹，如此合拍難怪Hinry都話：「夾到咁夫復何求呢！」

到底《Wednesday Night》有幾勁？你聽下就知㗎喇！

「未能接通」要行世界Tour！

「未能接通」除了羸過本地的比賽，還贏過省港澳的比賽得到冠軍，年尾將代表香港到北京《迷笛音樂節》演出；另外，不少廣州的Live House都相繼邀請他們演出，對他們來說相當鼓舞。Hinry表示：「雖然當初話要行世界Tour好似有啲無稽，講出嚟都會俾人笑，但係依家開始咗行第一步，對我哋嚟講係一個強心針。」

現時越來越多樂隊在主流樂壇佔一席位，「未能接通」會否視某一個音樂單位為追趕對象？Hinry自信地表示：「其實我哋冇呢個目標，就係要做番自己，做『未能接通』，因為假設我哋有一個好明確嘅目標要做邊隊Band，我就會變成嗰隊Bnad嘅影子，但係我哋就係『未能接通』！」