【專訪．有片】陳柏宇為個唱操練出大胸 　透露嘉賓：未合作㗎！

還記得陳柏宇早年上載過一張6嚿腹肌嘅猛男相，確係賞心悅目，原本打算藉住呢個訪問喺健身房進行，可以叫佢騷騷肌，結果佢竟然拉親條腰！見佢玉背貼上大大塊止痛貼，真係名符其實陳伯。「今朝起身鼻敏感打噴嚏時，唔小心拉親條腰，不過呢啲好快好返。」距離演唱會尚餘一個多個月，陳伯真係要好好保重身體。

雖然個唱上陳柏宇係唔會露肌，但佢就話可能屆時會有啲真空西裝，所以健身是必要的，而一講到健身，佢就即時以專家口吻講出好多聽完都未必明嘅理論，更強調自己唔係為追求大隻而健身。「啲人話我腳幼，但我本身喜歡卡通人物身形，即係slim得嚟有少少肌肉嗰隻，所以好少操腳。如果想有腹肌而啲線條又現的話，最簡單就係瘦，脂肪比例低的話，少少線條已經好明顯。」按陳伯所講，他1星期大概會操4日，每次約兩三小時，隨着大日子愈來愈迫近，他希望每日可以排舞、練歌、操肌、臨瞓前打舖機，最好連訪問都唔使做。「當然啦，如果公司話唔得，要keep住曝光，咁咪做囉……我太好人啦。」陳伯之所以想減少曝光，專心排練演唱會，其實係因為佢曾試過狀態不佳下練歌，結果搞到聲帶有事，為免重蹈覆徹，都係小心啲好。

咁演唱會部分又準備成點呢？陳伯好官腔咁表示：「一日未on show一日都係準備中。」他說歌單部分已經準備好，每場多於30首！而兩日都會有幾首歌係唔同嘅。「因為有啲歌係我好想唱，又有啲歌係大家覺得我一定要唱，自己想creative同有特性一點。可能有個卡拉OK時間會唱晒你哋想聽果啲，但點set到同一個tone，呢個仍在研究當中。」除歌單之外，大家最關注的一定係嘉賓環節，陳伯又好官腔咁表示唔會特別公布，但一定有驚喜，他之後更笑笑口話：「未合作過㗎。」兩場演唱會門票極為渴市，問到陳伯有無欠下一身「飛債」 ，他笑言之前不時有朋友找他落飛，但因為自己大頭蝦，十次有九次都唔記得「報數俾公司」，結果造成「渴市」狀況，所以他在此作出溫提：「其實搵陳柏宇係最難買。」

由於拉親條腰，為免加重傷勢，所以呢個訪問最後突變為唱K，陳伯原先只係諗住唱少少《尊嚴》，但結果唱晒全曲，全因呢個唱K apps對陳柏宇靚聲似乎有所懷疑，分數一度下滑，反觀用怪聲唱，分數持續上升，令陳伯最後得到「天籟之音」級別，想睇陳伯唱K，就要睇片啦！

場地提供：King's Fitness