【不懂撒嬌的女人．劇評】熱烈過後冷靜評：演員出色其餘差勁
落筆嘅時候，大台劇《不懂撒嬌的女人》已經播咗大結局有10日咁耐喇。我隔咁耐先寫對《撒》嘅感覺評價，係希望大家可以靜心啲去睇，畢竟呢套劇大家睇到起晒哄，但又係咪真係咁好呢？
我喺自己個facebook page做咗個調查，有218個觀眾畀咗反應。覺得個大結局「好正」嘅觀眾有21個（9.63%），「收貨」嘅有17（7.80%），「普通」嘅有34（15.60%）、「差咗啲」有51（23.39%），「好差」嘅有20（9.17%），而無表態畀咗like嘅有75（34.40%）。我要強調，演員係發揮得好好，但其他方面都係差。
「港視班底」做基礎
《撒》劇一洗大台頽風，平均收視雖然超越唔到年頭播嘅《親親我好媽》，但係話題度十足，甚至係全民討論，比起《親》劇播嘅時候更有氣勢。夾住「香港電視製作班底」嘅個優勢，令到一班自從香港電視不獲發牌而熄機唔睇電視嘅人，重新開返部電視。亦唔排除佢哋其實一直都有睇電視，只係唔講畀人知，今次令佢哋現返形。再加上一路都捧開大台嘅觀眾，氣勢真係好強勁。宣萱同埋林文龍回巢都有幫助，你知啦，依家好多演員演戲都冇「戲味」，有得睇返啲老戲骨真係如獲甘霖。
4K 唔關普通觀眾事
宣傳呢套劇一直非常標榜兩件事：「4K」同埋「實景」。「4K」其實對好多觀眾嚟講都唔關事，因為喺免費數碼頻道根本係收唔到4K質素，要睇就要喺myTV SUPER度畀錢，仲要你有部4K播放器。無錯喺普通高清電視機去睇畫面會靚仔咗，但絕對唔係4K嚟。但又真係有唔少觀眾因為「4K」而去睇喎，宣傳上係好成功嘅，我希望政府同埋電視台可以合力推進吓電視業發展，人哋日本喺2020年東京奧運會推8K呀，我希望2020年我哋可以追上黃金時段用4K播放。
實景有乜必要？
另外一個賣點就係全劇實景拍攝，呢個就冇呃大家嘅。不過實景有啲咩咁值得追捧呢？或者咁問，實景如果係對於劇情冇幫助，何必要用實景？美日韓陸劇，就算係ViuTV嘅劇好似係《三一如三》同《詭探》咁，都有用「假嘅」、布景組做嘅景，係冇問題呀，因為佢整得靚。所以如果大家只係為追求實景，但其實都只係啲辦公室呀、屋企裡面嘅景嘅話，就應該追求佢哋靚到「似實景」，以唔係單憑佢係實景就經已讚到上天。
我好憎啲廠裡面搭得唔靚嘅景，但我覺得「廠景」令到我最反感嘅，係「世界燈」燈光，打到一絲暗位都冇，唔真實之餘亦冇戲劇感。睇返《撒》裡面啲燈光，其實大部分都冇乜花心思，絕大部份都係世界光嚟。純粹燈光嚟講，我唔講得同廠景有乜分別或者進步。
情節老套 重重複複
講「不懂撒嬌的女人搵唔到男人」、「結婚生仔係女人嘅人生目標」已經老套到不能接受，再加埋「有工作就唔可以有愛情或者親情」就真係太老套。第一季（1至14集）靠住宣萱做惡魔高層可以沖淡呢啲老套感覺，但一去到第二季（15至28集）就真係原形畢露，老套到一個點。相傳老套到大陸網愛奇藝唔要佢而改要《踩過界》。（呢個亦都可以解釋埋點解會有第一、二季，因為佢本身係放喺網上點播。）
人物枝節多 偏離劇情
到底個主角係宣萱+林文龍，王浩信+唐詩詠，定係張達倫+譚凱琪？首先我要講多次，呢套劇嘅演員做得好好。可能係因為要casting有關。但係故事真係太多枝節，主線唔清楚，完全唔關個劇名事……去到第二季，有一半集數都冇咗主角條線，反而集中咗喺張達倫同埋譚凱琪身上。唔係話Oscar同Annie條線唔好睇，張達倫仲做得好好，但佢哋條線根本同宣萱、林文龍條線冇交集，亦都睇唔到佢哋之間有咩對比可以突出個主題。當然有機會畀每個演員去發揮係好，但係為咗呢個目的而犧牲故事嘅完整性、集中性就本末倒置。直接開個外傳畀佢哋好過啦。
但係話說回頭，如果冇咗張達倫、譚凱琪條線，第二季根本係冇嘢睇咁濟。有網上傳聞話本身套劇只係得20集，最後加到28集，係咪咁嘅原因所以劇情變得鬆散？冇人知。我只知道有好多觀眾同我一樣，覺得第一季完咗佢就perfect。
空有金句 缺乏推進
呢套劇其中一個大家會討論嘅就係啲金句。Gordon嘅「我想你管我」，Mall姐嘅「我下半世乜都唔做，淨係管住你」，Saving嘅「我唔係想發達，只係想做啲嘢可以令到個世界為我改變少少」，句句都華麗堂皇、感動人心。但睇返啲劇情推進，可以話冇乜幫到呢啲金句去建立，即係發揮唔到最強效用。最搞笑嘅係無啦啦向《創世紀》致敬，最後原來係幻想情節，真係反高潮，睇到眼都反……
以《撒》為最低水平
全劇第一季差不多靠宣萱一人之力撐起，跟住第二季就靠一個個分散而唔對題嘅演員表演，加上冇劇情推進而橫空爆出嚟嘅金句去支持，最後得到咗平均收視24點，最高衝到29點嘅成績。
我最高興嘅係各位觀眾會因為大台作出嘅「改變」而去睇電視，因為如果大台改變而得唔到收視上支持嘅話，佢就更加唔會改善製作。而《撒》令到香港出現返全城睇電視嘅風潮，呢種感覺對於電視迷嘅我嚟講真係非常之正。另外，我都非常希望見到演員有機會發揮，今次喺《撒》裡面，高海寧、張達倫、商場四大美人之一嘅林秀怡、暉型二子之一嘅黃德生、魏焌皓、趙樂賢、葉凱茵，睇到佢哋有機會發揮係好開心，證明大家都做到，只係冇機會畀佢哋去做。
最後，我希望大台、其他台，仲有各位觀眾都以《不懂撒嬌的女人》作為最低標準，以後嘅劇如果太低水準嘅話，就唔好睇喇。如果唔係電視台又點會花心機去製作啲認真節目畀我哋睇呢？
（文章純屬作者意見，不代表香港01立場。）