【專訪．有片】黃樹棠係劉家良徒弟：想當年同徐克周潤發稱兄道弟

由麗的去TVB又回亞視，再到亞視沒落之後，黃樹棠先後去過星馬泰發展，最後在朋友介紹下，到了越南拍劇，而且是每年一部40集長劇，他說第一部近似《黃飛鴻》，充滿了中國武術，深受當地觀眾歡迎，也讓他得到視帝名譽。「我甚至兼顧武指，因為那邊呃到人嘛，這邊（香港）有咁多大哥呃不了。」年齡對他來說，只是一堆數宇，退休對他而言，更是諗都唔使諗。問到為何要大老遠跑到越南，而不選擇留港，棠哥說主要是不想再被電視台的合約拘束。「當年係唔開心咁離開TVB，所以（離開亞視）唔會再返去，港視有搵過我，但人人都話亞視人個價會低一點，TVB就會高一點，我問對方我應該是那個價，跟他們說俾唔起就唔好搵我，我又唔係初出茅廬的小子，怕他們什麼？」棠哥不否認王維基是有心搞電視，但在他的角度來說，太認真去搞，只會死得更快……電視業聽來實在有點悲哀。
 

唔怕得罪人

TVB拍劇出名有開工無收工，棠哥說自己身體狀況大不如前，通宵捱不了，所以索性不接。但在越南那邊，日出而作日入而息，完全不會有壓力。加上有感香港的劇集質素每況愈下，為免做壞生招牌，不拍也罷。

棠哥說近十年就算有朋友介紹他與內地的投資者認識，他大多食完一餐飯就算。「因為唔想惹麻煩，怕俾人過橋，我分得好清，在這一行，難道你話無飯開，投資者便會拎舊錢去接濟你？」自認牙擦，也不怕得罪人，閒時與老友喝個下午茶就已足夠。香港觀眾可能以為他是甘草，離開電視台就沒工作？非也，棠哥除了在越南紅到爆外，在中國也不時有工作機會，在香港拍戲只算是賺外快。曾幾何時，他也擔心自已老年的生活狀況。「但原來人老了，唔係用得好多錢。」

同徐克無緣

曾於麗的電視擔任武指及演員，因劇集《十大刺客》而大受歡迎，後來棠哥獲徐克邀請，出演電影《蝶變》兼任武指，首次執導的徐克因此作而展露頭角。「當時他跟麥當雄借用我，我全心去幫，但可能沒緣份吧，之後就無再合作，亦都無聯絡，他也可能是急功近利的人，我師傅劉家良跟他也合作不來，之前《七劍》拍到一半就翻臉。」電影《七劍下天山》乃一代宗師劉家良的遺作，他參演及擔任動作指導，其主診醫生曾透露劉因拍攝《七劍》而令病情惡化。

「人情味唔係話無，但當各有各忙就少見，我唔會怪，大家都明白這圈子，一班人打天下，上位之後就各散東西，好聽叫緣份，唔好聽叫名利。我同周潤發拍《親情》玩得好埋，之後開戲（《血汗金錢》）都會搵佢，十幾年來稱兄道弟，但分開之後，見面都會打個招呼……跟成龍、洪金寶也是在心中，他們有他們的層次。」棠哥說時帶點唏噓。