炎明熹否認是姜濤粉絲　坦承演唱會唱姜濤歌經公司審批：我冇偶像

炎明熹（GiGi）早前開騷受颱風小犬來襲，令處女個唱第2場被迫延期。不過Gigi於首場演唱會唱出姜濤的歌《Dear My Friend,》感觸落淚，事後獲姜濤在社交平台留言打氣：「很棒加油。」

今日（23/10）Gigi現身香港電台出席港台節目《香江暖流》「至愛陳百強30年紀念特輯」錄影，就事件接受《香港01》訪問時表示：「其實我都估唔到佢佢會留言幫我打氣，咁所以我覺得好榮幸，而嗰一日我係開心到瞓唔着。而我私下都有私訊多謝佢，而佢都有回覆我，話呢首歌畀到力量我，佢都好開心。（你算唔算係佢一位小粉絲呢？）暫時我嘅人生係冇偶像住，但係每一位都好鍾意，因為都係我學習嘅對象。（你唱姜濤嘅歌，需唔需要經過公司審批？）我諗要嘅。但係都應該Ok嘅，因為最終都唱咗出嚟，咁所以自己都好開心。亦都希望日後能同唔同嘅歌手朋友一齊合唱。（你想，但唔代表公司想！）我相信交朋友係一件好事，咁所以冇話唔好，又冇話好，但我就覺得都係好。」