容祖兒認早知蔡卓妍分手：佢話而家唔介紹男仔畀我，留畀自己先

《ANOTHER SIDE...... JOEY · MY SECRET · LIVE》 容祖兒演唱會第30場，今晚繼續在香港演藝學院舉行，完騷後祖兒接受訪問，除了講演出外，不免被問起好姊妹蔡卓妍（阿Sa）近日與拍拖六年的男友石恆聰分手一事。

祖兒開騷期間，阿Sa不止一次來探班，而祖兒在台上分享感情事時，都談到阿Sa為她的感情事著急，曾介紹男仔畀祖兒識。但如今阿Sa都回復單身，是否要結伴去識男仔，祖兒笑說：「讓咗佢先，佢話佢而家都唔介紹男仔畀我啦，佢自己睇啱咗先，留俾自己先。」

被問可有慰問阿Sa，祖兒表示冇特別慰問，並謂：「我哋都唔需要借呢個時間去慰問，佢嘅事情我哋都一路都互相update住。（你一早知？）知知地啦。」