【毒到盡頭】女生開Page直播情人節一人晚餐：其實有咩好怕！

其實自己一個更開心？「毒到盡頭便是型，其實一個人又有咩好怕喎。」90後女生黃正宜（阿正）說。
「一位呀唔該」，幾多人說不出口？於是，阿正開設Facebook專頁「一位呀唔該」，代他們勇敢說出來。一個人吹水、唱k、影貼紙相，和吃情人節晚餐。

玩大左：一個人的情人節晚餐

【毒到盡頭】實測一個人玩咩好？唱K被拒光顧 影貼紙相變空白照

「點解要開Page？」這是訪問時第一個問題，還未「認識」阿正前，以為答案會是「其實自己一個更開心」，卻恰巧相反。

導火線來自單身人士最憤恨的情人節。

情人節前，沒有情人的阿正一早把行程塞得滿滿，想以「充實的一天」避過閃光彈。但上天彷彿要懲罰「單身狗」。前一天，阿正才得知當晚的結他班取消，「畀班朋友恥笑『阿Sir都放你飛機』。我嬲嬲地，講笑咁係Facebook話『咁我不如一個人食情人節晚餐囉』，啲人舉腳支持，他們都是食花生的。」Facebook傳播力之強，不容忽視，特別是花生味濃的帖文。這個行動派立即開了Facebook專頁「一位呀唔該」，直播情人節晚一個人到「宜家家居」吃情人節套餐，「做個找數真漢子」。

阿正以近乎悲鳴的聲線說：「（當初覺得）玩大咗。」記者問：「怕一個人嗎？」阿正：「唔係呀，有咩問題呀？唔驚，雖然叫做『一個人乜乜』，但我其實唔係一個人，因為直播好多人陪住。」阿正怕的是拿着電話自言自語直播，如瘋子的舉動，惹來旁人的奇異目光。　

情人節：單身就是罪？

街裡愛人一對對，互送鮮花心意祝福句。情人節、聖誕節，這座狂歡城市好像只容許相聚，沒有獨處的安靜。於是，有些人怕一個人，要兩顆心一起才算正常。阿正夾在「單身就是罪」的日子，常被朋友嘲笑「一支公」，她自言看化了，「哈，愛情呢家野，寧缺勿濫。我不想因為怕寂寞而搵個人一齊。」

歸根究底係咪我怕寂寞？

「其實你享受一個人嗎？」我又再問多一次，不然情人節何以如此不安？

「其實一個人又有咩好怕喎 ！」大咧咧的阿正沒有這樣答，她認真說：「這是一個好問題。」其實她介意過一個人。

回復單身時，孤單感更赤裸，「以前找不到朋友吃飯，還有另一半隨時在旁。後來變回單身，會變得不習慣，其實我為什麼一個人吃飯就要不開心？」阿正忽爾大笑：「其實歸根究底係咪我怕寂寞？」阿正反問，問記者還是問自己？

從何時開始忌諱空山無人？從派對狂歡過後，獨自回家的路上。明明如此盡興投入，明明已經盡力去笑，一絲絲空虛感卻滲入體內。阿正發覺沒有同伴不行，自言是依賴朋友的類型，「回家路上，我覺得好寂寞，會掛住我的朋友。」

大家的生活不再同步。朋友的社交圈子亦不只有你，你要學識自己一個。

怕：一個人係傻，一班人係熱血

在人來人往的商場拍訪問照時，阿正戚戚眉：「不用客氣，你想我擺什麼Pose都可以。」不難想像，她是「大癲大肺」那種性格。「其實我好細膽，平時有朋友旁住就咩都唔驚。就好似有啲野，你一個人做係傻（原字為粗口），成班人一齊做咪熱血青春囉！一起傻嘛！」看起來如巨人的強大，背後原來由朋友支撐着。

時間會走，誰也會走。「以前返學好易見到。今日有唔開心呀？聽日同得佢傾啦。現在不是，大個左，不可以奉旨有一個人陪伴你，大家的生活不再同步。朋友的社交圈子亦不只有你，你要學識自己一個。」

我們的成長習慣了同伴

「例如食飯冇人陪，以前返學覺得一定有人一齊食飯。你不如自己做啦，有時想做一件事，可能畀朋友困住咗，等等下冇左件事。我好奇怪，好驚自己去剪頭髮，以前會搵人一齊剪。但後來有自己的步伐，就自己一個剪。」於是，阿正開始學習一個人。

「我以前唔理解我細佬，放假一星期留在家：打機、煲劇， 瞓。我會覺得係好似浪費時間。」她原是工作狂，假日沒節目，人變得空洞，「後來情緒有點問題，學習調整心態，今日咩都唔做，都可以係一種享受。以前唔識面對，就會覺得好灰，想搵人搵唔到。想通之後，點解你個周末一定要搵人同你過先？一個人也可自娛。」

一個人食飯：偷聽是樂趣

一個乜乜乜，最高級別是什麼？阿正思索一會，寫下「目標」。

低級：一個人行街、食飯、睇戲
中級：一個人唱K、影貼紙相、打邊爐、旅行
打大佬：一個人坐鴨仔船泛舟湖上、去迪士尼

獨自吃飯是「毒」的最低Level。一個人最怕入「等緊位」的餐廳，獨自坐在二人餐桌前，如受刑，好像浪費了位置，阿正反斥：「痴線，不知幾爽。我最愛吃樓下的泰國餐廳，幾乎都是四人枱。一個人坐四人枱，不知幾闊！」自己一個不代表要虧待自己，阿正依舊會選擇好餐廳，「重點要好吃嘛。」有人說，吃飯重點不是吃什麼，是和誰一起吃，只因醉翁之意不在酒。當吃飯只剩下自己，焦點會否回歸美食上？「會10分鐘就食完囉。其實都不會留意放咩入口，因為你都是煲劇，玩手機。」Facebook也會「碌」到盡頭，「那就偷聽人地講咩，幾有趣。有次聽到個囡同媽講『得啦，你好煩』，覺得個囡好差。再諗起自己都咁對阿媽，原來那副嘴臉是如此討厭。」

一個人看四次演唱會

「一位呀唔該」之前，阿正已經試過「一張飛吖唔該」，共四次。第一次看何韻詩演唱會，是朋友免費讓飛；第二次看有陳奕迅的音樂會，是阿正即日買飛即晚看，過於即興趕不及約朋友；第三次看外國歌手Mika演唱會，找不到同好，亦適合一個人看；第四次看何韻詩演唱會，依舊一個人，無奈地一個人。「身邊有人鍾意何韻詩，仲話到時一定去睇。點知到個陣，就拍哂拖，要同另一半去睇。」阿正無奈說。

一個人，演唱會失色了嗎？「快歌的時候，冇咁High，好多動作冇咁放。有個人陪你嗌，你會夠膽揈。」一個人，又會看到另一道風景，「平時掛住同朋友講『嘩，好靚』，一個人會留意好多細節，如舞台燈光、歌詞牌、歌曲編排原來有意思。」

「我最初一個人是因為難約或約不到人，無可奈可。後來有些時候，我會選擇一個人去過。」

每逢佳節上高登，一個人就等於毒？「其實看你的態度，一個人認真做一件事時是型。又是這個兩睇的例子，一個人做就是傻，一班人做就是熱血。」阿正說。

「毒到盡頭便是型，其實一個人又有咩好怕喎 。」這是「一位呀唔該」的簡介。