【不懂撒嬌的女人．劇評】唐詩詠演出意料之內　宣萱表演才是重點

《不懂撒嬌的女人》喺大台 sell「4K 拍攝」同埋「實境拍攝」催谷之下，加上宣萱同林文龍呢個配搭，另加「港視」班底，令到呢套劇變成觀眾嘅話題劇，首播平均有 24 點，最高 25 點。會唔會成為近年少有破 30 點嘅劇，就要拭目以待。
睇完第1至第7集，小弟膽粗粗寫劇評，不過如果佢唔再好睇，我就會停喇，無謂浪費大家時間。

演員及角色設定：

我睇呢套劇唔係為咗 4K 同實境，而係因為宣萱。宣萱飾演呢啲憎男人嘅女強人駕輕就熟，甚至有觀眾問到底宣萱有冇演啲唔憎男人嘅角色（係有，大家最記得應該係《難兄難弟》，佢仲要追求吳鎮宇），就知道大家心目中嘅宣萱就係演呢啲角色嘅表表者。今次亦都冇令到大家失望，演魔鬼上司好成功。加上唐詩詠一剛一柔，一個唔要男人，一個畀男人玩到傻，係經典嘅人物寫法，對比令兩個角色更加出。

不過頭七集，都好似係着力寫宣萱，反而林文龍嘅描寫唔係好強。口口聲聲話要拎走宣萱所有嘢，但又冇乜背後原因（我估都係想宣萱相信愛情啩）。佢同王浩信嘅角色一內歛一外露，都係用對比寫出角色性格，不過兩者相比，王浩信嘅角色出好多。從來都係誇張易演，內歛難做，希望林文龍發揮到。

王浩信同埋唐詩詠嘅演出係意料之內，畢竟都係佢哋嘅拿手好戲，王浩信跳脫、唐詩詠慘情。但係「商場四大美人」鄧佩儀、孫慧雪、林秀怡，仲有「暉型三子」黃得生、康嘉麟一走埋就好有驚喜，令成套劇生色不少。另外做宣萱手下嘅魏焌皓爆膽石、人事部主管葉凱茵夜麻麻畀宣萱林文龍嘈醒都好正。其實好多演員都做到，差在有冇機會。做游老闆嘅袁文傑一出場更加引起一陣網上哄動，個個讚佢有型似老闆，話晒亞視收檔之後都見唔到佢，大家係激動啲。

橋段：

其實係娘嘅，愛情劇根本好容易會變得娘，今次主軸係講「中女唔信愛情，信自己信事業」已經好明確，宣傳時轉移視線賣「兩岸三地女人大比拼」係幌子。所以宣萱同林文龍鬥法以外，劇情就變得老套，冇乜火花。其實好多位都寫得唔太好，有啲薄弱。例如係回憶片段，好似係後生版兩個主角江嘉敏加楊潮凱，同埋小朋友版本嘅宣萱同唐詩詠，出到嚟都只係交代原因，做唔到令人感動，特別係宣萱細個畀阿爸拋低嗰段，浪費咗做宣萱細個嘅演員梁暐昕。

不過最弱都係王浩信同埋唐詩詠條線，搞咗咁耐其實都 feel 到編劇係寫王浩信鍾意唐詩詠，但就只差一點點。明明王浩信幫唐詩詠趕走黎諾懿、買返半層樓，但都冇一個位安排去 click 嗰吓火花出嚟，但第 7 集就已經要王浩信避走台南……又唔嘗試用力啲將王浩信之前自覺唔夠錢畀唔到幸福女朋友嘅感覺同唐詩詠扣埋一齊，成件事根本唔夠力去推動……

鏡頭、畫質：

今次 sell 得最多嘅 4K 拍攝，雖然一般觀眾係睇唔到 4K 質素（因為你要有 4K 電視之餘，仲要收到無綫嘅 4K 輸出先得，普通收數碼頻道嘅電視根本冇 4K 質素提供），但都可以見到鏡頭畫面嗰陣味變咗，因為大台今次用咗新機去拍。有觀眾話好似大陸劇，我又唔多覺。我反而覺得似 HKTV 劇，呢個我仲未搵到原因，可能係個色調似。

另一個 selling point 係實境，商場係實境就成日都係啦冇乜特別，但係辦公室少有實境就係真嘅。不過話分兩頭，全實境你就要畀多啲心機去打燈，如果唔係咪又係變返世界光。暫時喺商場同埋辦公室都同世界光差唔多（非戰之罪，因為商場日頭同埋辦公室喺現實世界都係世界光），反而喺王浩信嘅製作公司就見到有特別打燈，不過又唔係真係好有心思。

要讚嘅係分鏡，終於唔使睇啲兩個分鏡擺位就完全場嘅戲。不過一開始頭兩集嘅分鏡好多都為分而分，有啲甚至阻住觀眾投入，例如係唐詩詠知道黎諾懿有第二個女人時整爛新屋幅牆嘅喊戲，分鏡多到投入唔到唐詩詠嘅感情，人哋做得咁好真係嘥料……

一句到尾，暫時都係睇宣萱表演！

（本文純屬作者意見，不代表香港01立場。）