【三個傻佬學煮餸．梅蘭菊竹】人生風雨，每傲雲雪，雪冷花更妍

Jim舊老細挑戰三傻，梅蘭菊竹，任君演繹！
舊老細兩公婆，乃設計界老行尊，拋出四個字，想點？

為此四道菜，阿Jim苦惱了好一陣子。

三傻今回破天荒！事前開會，起承轉合，有菜一齊炒，有鑊一齊孭。

梅，如何下廚？如何演繹？

Jeffrey係IT人，唔係文青。他心目中的梅花，只係撲克牌上的黑花圖案。Eric又老又傻，扮有文化，其實冇乜墨水。梅，他竟然cheap到提議：藍莓炒齋豆腐，仲作個菜名——「藍莓本無肉」。此橋一出，馬上俾人否決。

Jim經常扮鬼扮馬，其實有一顆文青的心。佢好柔情咁講，梅，在國畫之中，寒風殘雪禿枝，紅梅黃蕊奌奌，嘩！講到好鬼死詩情畫意。好啦，就咁去馬！但，點煮呢？請問！

一片白雪、一抹豆腐、兩塊鮮魚，然後配一支梅花囉！

Jim試用比目魚，去皮起骨，清蒸當「白雪」。唔成功。啱啱老友在西貢釣得鮮魚，傾籃相贈。他就拆骨起肉，魚骨做湯汁，魚肉做「雪片」，再在碟底鋪豆腐，做出雪地背景。

咁主角呢？Eric在雲南大理街市，購入四年火腿，切成淺粉紅色的腿茸，倣梅之餘，亦有鹹鮮味。最後用粉紅色的甜酸薑，做一朵梅花點綴。

人生風雨，但願，每傲雲雪，雪冷更花妍。