【武術01】曹星如唔係「第一」㗎啦咩？

曹星如會喺3月11日同日本拳手向井寬史比賽，當然全城注目。我見各大報道都係講曹星如，但係今次打咩腰帶呀、佢對手嘅資料呀都好少提。咁其實好正常，支持自己友嘛。但係，拳擊比賽就要兩個人先打得到，講下對手係咩人都好應該。

入正題，曹星如今次對手係咩人?爭咩腰帶? 

爭咩腰帶?

今次Rex要爭取衛冕WBO超蠅量級國際拳王(WBO International super flyweight title)同WBC超蠅量級亞洲拳王(WBC Asian Boxing Council super flyweight title)，贏咗就可以攞埋對手向井寬史嘅WBO超蠅量級亞太區拳王位(WBO Asia Pacific super flyweight title)。所以係三條腰帶。

講講咩係WBO先，之前講過，拳擊係有唔同比賽公司嘅，最大嘅有四個: WBC、WBA、WBO同IBF，細嘅單單美國都有近70間。呢四大拳擊公司都係世界性，所以都可以出「世界冠軍」。

所以，WBO超蠅量級入面最有價值嘅腰帶係WBO超蠅量級世界拳王(WBO World super flyweight title)。其他國際拳王、亞洲拳王、歐洲拳王含金量都比唔上世界拳王。

唔係世界「第一」㗎啦咩？

搵返WBO或者排名網，大家可以睇到，喺Rex Tso(即係曹星如啦)上面仲有一位，叫Naoya Inoue，亦即係曹星如之前講嘅世界冠軍井上尚彌。

所以呢到個「第一」有歧義。當我哋一聽到「第一」嘅時候，例如小明賽跑跑「第一」，我哋就會知道佢贏咗個比賽，佢係冠軍。但喺拳擊入面，世界拳王係唔洗再有排名嘅，世界拳王就係世界拳王，排名第一同世界拳王係分開嘅。

拳擊排名升跌係睇戰績，做世界拳王就要打返嚟。你要做世界拳王，就必須要打贏現時世界拳王。除非出現空缺，但就算出現空缺，都係要同另一拳手比賽，總之，腰帶一定係打返嚟。

情況有少少似猜皇帝，你贏好多人，排隊排到第一個，無錯你係第一，但唔代表你係皇帝，你要猜贏佢先係皇帝。

但同猜皇帝唔同，世界拳王頭銜戰唔一定係拳王對排名第一嘅，呢樣嘢要睇經理人公司，例如排名WBO第一嘅曹星如今次打嘅係排名14嘅向井寬史(Hirofumi Mukai)。

咁向井寬史咩來頭?

講排名不如直接睇圖：

紅圈係呀Rex，藍圈係向井寬史。

喺Boxrec.com嘅世界排名，Rex就22位，向井寬史就25位，順帶一提現時WBO世界拳王井上尚彌排第2:

睇返戰積13勝4負3和，13年挑戰WBC World super flyweight title失敗，14年一勝一和，15年一勝一負，16年兩勝一和，唔算特別好。KO率方面亦唔高，13場贏嘅比賽入面有3個KO，KO率唔高，反而輸KO率較高，4場敗績入面有3場係輸KO。

向井寬史現時持有嘅超蠅量級亞太區拳王腰帶，其實曹星如都贏過，不過交還返。所以，今次係曹星如被向井挑戰。

咁咪即係向井好唔掂?

咁輸同挑戰失敗有好多原因嘅，呢方面我交返俾專家答你：

幾時可以打世界拳王?

打咩人唔係由拳手自己一個可以決定，拳手嘅經理人會考慮唔同因素去搵對手，例如場比賽票房會唔會高呀、兩個人幾受歡迎呀，兩個人風格會唔會好悶之類。但其實講咁多都係一個字 ：錢，錢嗰面解決咗，又有收視保證，排名靠前要打就唔大問題。職業拳擊你懂的，叫得「職業」當然有商業考慮。

今次係咁多！

（本文純屬作者意見，不代表香港01立場。）