【武術01】曹星如唔系「第一」㗎啦咩?


曹星如會喺3月11日同日本拳手向井寬史比賽,當然全城注目。我見各大報道都系講曹星如,但系今次打咩腰帶呀、佢對手嘅資料呀都好少提。咁其實好正常,支持自己友嘛。但系,拳擊比賽就要兩個人先打得到,講下對手系咩人都好應該。
入正題,曹星如今次對手系咩人?爭咩腰帶?
爭咩腰帶?
今次Rex要爭取衛冕WBO超蠅量級國際拳王(WBO International super flyweight title)同WBC超蠅量級亞洲拳王(WBC Asian Boxing Council super flyweight title),贏咗就可以攞埋對手向井寬史嘅WBO超蠅量級亞太區拳王位(WBO Asia Pacific super flyweight title)。所以系三條腰帶。
講講咩系WBO先,之前講過,拳擊繫有唔按年賽公司嘅,最大嘅有四個: WBC、WBA、WBO同IBF,細嘅單單美國都有近70間。呢四大拳擊公司都繫世界性,所以都可以出「世界冠軍」。
所以,WBO超蠅量級入面最有價值嘅腰帶系WBO超蠅量級世界拳王(WBO World super flyweight title)。其他國際拳王、亞洲拳王、歐洲拳王含金量都比唔上世界拳王。
唔繫世界「第一」㗎啦咩?
揾返WBO或者排名網,大家可以睇到,喺Rex Tso(即系曹星如啦)上面仲有一位,叫Naoya Inoue,亦即系曹星如之前講嘅世界冠軍井上尚彌。
所以呢到個「第一」有歧義。當我哋一聽到「第一」嘅時候,例如小明賽跑跑「第一」,我哋就會知道佢贏咗個比賽,佢系冠軍。但喺拳擊入面,世界拳王系唔洗再有排名嘅,世界拳王就係世界拳王,排名第一同世界拳王系分開嘅。
拳擊排名升跌系睇戰績,做世界拳王就要打返嚟。你要做世界拳王,就必須要打贏現時世界拳王。除非出現空缺,但就算出現空缺,都系要同另一拳手比賽,總之,腰帶一定系打返嚟。
情況有少少似猜皇帝,你贏好多人,排隊排到第一個,無錯你係第一,但唔代表你係皇帝,你要猜贏佢先系皇帝。
但同猜皇帝唔同,世界拳王頭銜戰唔一定系拳王對排名第一嘅,呢樣嘢要睇經理人公司,例如排名WBO第一嘅曹星如今次打嘅系排名14嘅向井寬史(Hirofumi Mukai)。
咁向井寬史咩來頭?
講排名不如直接睇圖:
紅圈系呀Rex,藍圈系向井寬史。
喺Boxrec.com嘅世界排名,Rex就22位,向井寬史就25位,順帶一提現時WBO世界拳王井上尚彌排第2:
睇返戰積13勝4負3和,13年挑戰WBC World super flyweight title失敗,14年一勝一和,15年一勝一負,16年兩勝一和,唔算特別好。KO率方面亦唔高,13場贏嘅比賽入面有3個KO,KO率唔高,反而輸KO率較高,4場敗績入面有3場系輸KO。
向井寬史現時持有嘅超蠅量級亞太區拳王腰帶,其實曹星如都贏過,不過交還返。所以,今次系曹星如被向井挑戰。
咁咪即系向井好唔掂?
咁輸同挑戰失敗有好多原因嘅,呢方面我交返俾專家答你:
幾時可以打世界拳王?
打咩人唔系由拳手自己一個可以決定,拳手嘅經理人會考慮唔同因素去揾對手,例如場比賽票房會唔會高呀、兩個人幾受歡迎呀,兩個人風格會唔會好悶之類。但其實講咁多都系一個字 :錢,錢嗰面解決咗,又有收視保證,排名靠前要打就唔大問題。職業拳擊你懂的,叫得「職業」當然有商業考慮。
今次系咁多!
(本文純屬作者意見,不代表香港01立場。)