職場文化睇真啲：中資企業篇

喺香港呢個國際城市，吸引世界各地商人嚟開公司，港資、中資、日資、英資、澳資公司我都做過。
究竟係咪外資就一定好，公司提供零食任食？日本人咁有禮貌，入日資公司同日本人合作會好開心？中資又有咩特別？
總有種種原因，令你未能不顧一切狂轉工，不如一連幾篇講吓唔同公司嘅文化差異，睇吓邊款適合你，既然過完農曆年，我哋就講中資先。

先講中資公司的好處，你今日望一望個 office，大部分同事都係「初四樣」，即係無咩心情做嘢，不過就同聖誕假後嗰個樣有啲唔同，聖誕後係玩到攰、恰眼瞓。而今日就明顯唔係「玩到爆肝樣」，一般人好少喺農曆新年蒲到夜，但返工都係心不在焉，因為磨拳擦掌等緊逗利是時機，如果你喺中資公司打工，農曆年有可能得到唔少「福利」，例如你今日都仲未啟市，因為老闆搵師傅計過，今日未係啟市吉日，咁你就無啦啦多咗假期；另外，國內老闆着重農曆年，開工利是通常都較鬆手。

包你有啖好食

「搵食搵食，辛苦得來旨在食」，傳統中資老闆深明呢個道理，部分中資公司會包員工伙食。我並唔係講緊要 OT 到 11pm 然後包你飯盒錢呀，係日日返工都包你 lunch，小型公司可能係有人負責煮飯，lunch 就大家圍埋食，又有公司會比返飯錢你，例如你人工一萬，出糧可能實收 $12000，當中 $2000 係飯錢。

仲有一個做法，Jennifer 喺某大型中資集團工作，雖然佢本身做財務信貸，但因為公司集團旗下有酒店，所以 Jennifer 即使唔係酒店員工，都可以去集團嘅酒店員工餐廳食 free lunch，味道？酒店廚師煮出嚟比手足食，當然唔會差！

細公司雖然未必有 free lunch，但 work-life balance 無難度，每日食晏同放工都 99% 可以準時，因為老闆們慣咗定時食嘢，開會開到一半佢都會叫停食咗飯先，就算佢唔係真心關心員工，佢都會關心自己個胃。

於豪華 office 工作

大家都聽過國內自遊行到香港點樣瘋狂購物，經濟發達令唔少中國人受惠，追求豪華生活，中資公司亦唔例外，為咗門面好睇，會好捨得大灑金錢喺辦公室裝潢之上，而品味亦如出一徹：reception 總有射燈、門口有抹到一塵不染，乾淨到好易撞埋去嘅玻璃門、雲石檯面會出現於 reception 或茶水間。

裝潢靚唔靚就見仁見智，總之一定價值不斐。

工欲善其事，必先利其器，喺港資公司，員工們就算要處理排版、剪接等工作，公司安排比你部電腦都多數係好慢好舊，但中資就唔同，就算部電腦只係用嚟處理文書工作，都好貴好新好快，對於辦公室每樣物件，佢地都好捨得洗錢，就只係未必捨得比高啲人工你。

煙味飄飄處處聞

國內並無室內禁煙這回事，佢地嚟香港做生意，除咗帶錢，都帶埋「一邊呼吸一邊吸煙」呢個習慣，試過一間只有五六人嘅中資公司，老闆絕無避忌咁喺辦公室吸煙，仲要係每個鐘都一兩枝，令人非常難受。

試過佢一吸煙，我地就走去廁所，諗住等佢吸完先返，當然都係避唔開，因為辦公室內牆身、窗簾、地毯全部都吸晒煙味，可能你會覺得呢種隨時隨地吸煙嘅老闆太極端，只有細公司先會出現。而其實大嘅中資公司都一樣煙味四伏，雖然佢地唔會明目張膽喺所有同事面前大吸特吸，但關埋門喺會議室入面一樣係開住會吸。

唔同文化都有好有壞，我唔想去講邊個國籍嘅公司係最好，只係想大家 send CV 之前考慮埋文化這回事，增加搵啱「職場 the One」機會，如果你已經做緊中資公司，有奇聞不吐不快，歡迎到我 Facebook 分享。

（本文純屬作者意見，不代表香港01立場。）