【每逢大事講故事】普京親身示範 君子報仇如何廿年未晚
剛過去嘅2016，呢個世界發生左好多大事，要數依家國際政壇邊個最威威？飛雲就話係普京是也。飛雲唔係認同普京以獨裁方式打壓反對人士，不過覺得呢個世界，點都需要有個人同美帝抗衡一下。
由特朗普當選美國總統兩個月以嚟，美俄之間嘅口水戰都未停過，現屆民主黨政府繼續指控係俄羅斯政府主使黑客影響大選，特朗普就懶理，同普京越行越近，任命一個史上罕見嘅親俄內閣班底。唔理你覺得黑客攻擊係邊個做，其實普京為咗重振俄羅斯聲威，根本部署咗好多年喇。
自冷戰結束，蘇聯瓦解之後，俄羅斯喺世界嘅角色一直都處喺美國下風，超級大國只有美國。特朗普做總統對於全世界黎講都太意外，不過對於一個人，或者係佢盤算之內，佢就係普京。忍辱負重20年，其實普京一直都密謀等候反擊機會，依家機會嚟喇，唔只出現一個親俄的美國政府，仲要唔妥好耐嘅克林頓夫婦，一鋪歸還！
要講普京同美國之間恩怨，不如先講番大約20年前嘅一個月黑風高嘅晚上。一個肥嘟嘟、白雪雪嘅醉酒佬，喺白宮附近一條暗暗嘅街上想截的士去食Pizza。佢身上淨係著住底褲，不停呼喚「Pizza!Pizza!」
NO! 唔係講麥兜呀，飛雲講緊嘅係俄羅斯時任總統葉利欽。呢單瘀事本來無人知，多得佢嘅美國好拍檔克林頓爆左俾自傳作家知，出埋書，呢件事先可以流傳萬世。
其實呢，克林頓同葉生真係幾friend，呢件瘀事都幫佢收埋左成十年先講出黎。葉生愛飲酒，發酒瘟實情全世界都知，連喺公開場合都可以講嘢講到飲醉咁，你睇克林頓比佢搞到笑到喊。「我覺得你真係好funny囉！」
美國同俄羅斯領導人可以friend到咁，真係好罕見，好罕見！當時嘅蘇聯剛剛瓦解，俄羅斯經濟非常衰弱，軍隊崩潰，成個國家一片混亂，葉利欽好希望同美國佬搞好關係，正正式式為冷戰畫上句點，美俄可謂步入蜜月期。
呢對兄弟當然講好數，克林頓想同俄羅斯建立穩定外交，葉利欽當然要美國「放水」以免俄羅斯經濟徹底崩潰。克林頓提出想擴充北約到東歐國家，葉利欽無反對，甚至講到終有一日俄羅斯都要加入北約。
相關文章：普京特朗普齊稱強化核能力 美俄將出現新一輪軍備競賽？
俄羅斯要認美國做大佬，有個人覺得好羞家，呢個係普京了。普京雖然係葉利欽嘅欽點接班人，但呢位Cool到爆淨係同老虎玩嘅KGB前特工，又點會好似你咁喺全世界面前扭黎扭去，丟人現眼？
對住呢位自由派總統，一大班KGB前特工都唔知好嬲定好笑，鐵漢普京相信更加無眼睇。
【專頁：新聞講故事】國際大事一看就懂：最易入口的新聞！趣味養份兼備
揸頸就命，呢四隻字就最能夠形容90年代嘅俄羅斯。普京認為冷戰結束後，國家受盡屈辱，葉利欽同克林頓嘅所謂友情，根本就係任對方話事，俄羅斯只可以say yes，亦都代表俄羅斯名正言順係冷戰嘅「戰敗國」。就同葉利欽一樣，俄羅斯由政治巨人變成一個丟架嘅醉酒佬。
仲記唔記得休克式療法？呢個簡直係美國攪死其他國家嘅其中一個殺手鐧。當年蘇聯崩塌，由共產主義底下嘅經濟體系要轉營到資本主義，過程非常痛苦。美國見狀，就話咁不如學吓我地啦。於是派咗隊經濟專家去俄羅斯教路，游說葉利欽進行休克式療法，由共產走到資本主義之路「唔使急，但最緊要快。」
克林頓1992年上場，繼續要俄羅斯休克。對於本身社會經濟極度虛弱嘅俄羅斯，要短時間內將所有土地、公營企業私有化，取消大部分補貼資助，點會唔出現「手術好成功，不過病人死咗」嘅結果吖。經濟狀況唔單止無好轉，通脹飆到2500%，國民收入暴跌，而且仲催生一班令俄羅斯腐敗嘅寡頭政治家。
相反美國就攞晒彩，喺克林頓嘅領導下成為全世界唯一一個超級大國，北約東擴，介入巴爾幹半島，轟炸南斯拉夫。嗱嗱嗱好喇喎，真係踩到過黎前蘇聯勢力範圍，仲成日話要幫俄羅斯重建經濟，建立民主。呢個理想如果成功嘅話都真係好偉大，弊在事實係最後搞到一鑊粥。葉利欽仲要同克林頓咁friend，據說，克林頓更曾經讚葉利欽：「係你個肚腩內有團真正屬於民主同改革者嘅火，不過我唔肯定普京都係咁。」
個國家比人搞到咁，普京BB看在眼內真係火都嚟埋，個心真係好痛好痛。
相關新聞：普京蔗渣價錢造出燒鵝味道 俄羅斯2016年國際影響力大豐收
古有越王勾踐臥薪嘗膽，今有普京靜候反撲機會20年。葉利欽嘅時代好快就結束，受軍方反對，加上多次心臟病發，喺1999年除夕辭職。憑住車臣反恐戰建功嘅普京喺翌年三月大選勝出，不過佢冇直接單挑美國，畢竟俄羅斯當時都係太虛弱。佢同時任美國總統小布殊，起初都算友好，喺美國發生九一一恐襲之後，普京係第一個打電話問候小布殊嘅國家領袖，Sweet到呢。小布殊直頭話過，我喺普京嘅眼睛感受到佢嘅靈魂！
原文係："I looked the man in the eye. I found him very straight-forward and trustworthy – I was able to get a sense of his soul." 嘩，真係深情過Shakespeare喎！
不過呢句說話好快就成為咗歷史笑話，連蘇珊賴斯都恥笑佢：「夠無知先會信普京」。小布殊隔左好多年之後講番呢段關係都酸溜溜，話普京當年見到佢隻愛犬Barney，居然笑佢：「你真係叫呢隻嘢做狗？」第二年到小布殊見到普京隻狗，普京居然再踩多腳：「大隻、強壯、快過Barney。」
呢番說話真係傷透小布殊個心，卸任總統後轉行做畫家嘅小布殊，多年後畫咗一幅普京肖像，畫嘅時候心入面都仲係諗緊普京點樣話佢隻狗。
「講得出『我隻狗大隻過你嗰隻』這句話的人有很有趣的性格。這幅畫反映了出來」係小布殊畫筆下，普京眼神空洞，面無表情。
【專頁：新聞講故事】國際大事一看就懂：最易入口的新聞！趣味養份兼備
好喇喎，正所謂禍不及妻兒，你連我隻狗都要侮辱？呢單嘢，小布殊真係記到今時今日，早兩年仲講緊，真係耿耿於懷從前的愛~ 上年布殊細佬杰布選總統，都被問及點睇普京，佢就話：「佢係惡霸。我覺得普京變咗。人係會變架，佢就係例子喇。」如果佢當選美國總統，一定會強硬應付呢個惡霸。（可惜你都選唔到）
呢對soul mate好快就唔騷對方，美俄關係喺2008年又出現一個爆發點。如果大家仲記得當年夏天俄羅斯出兵格魯吉亞。普京就認為係小布殊政府煽動格魯吉亞親西方政府打呢一場杖，佢當時咁講：「美國有人試圖製造衝突，喺總統大選中造就某位候選人。」
咦！呢句嘢聽落真係似曾相識，查實佢當時指嘅就係共和黨嘅麥凱恩，布殊政府挑起「新冷戰氛圍」就係為左幫佢助選。講咩都係假，普京嘅憤怒根本一早已經積積埋埋，喺奧巴馬上台嘅時候，美俄已經處於一種敵意狀態。負責外交嘅仲要人係克林頓個老婆希拉里，希拉里呀希拉里，其實你知唔知自己點解選總統連特朗普都爭唔嬴？因為你一早已經得罪左人。
我地又返到1994年，當時身位第一夫人嘅希拉里陪老公第一次訪問俄羅斯，葉利欽有一次晚飯時同希拉里講，office裏面有張佢嘅相，日日都望住。嘩，真係聽到都毛管戙，不過咁就證明希拉里有幾Charm。
可惜...家下話事嘅係普京唔係葉利欽，普京對希拉里嘅態度啱啱相反，奧巴馬想同俄羅斯關係回暖，但喺普京眼中，希拉里根本同佢老公一樣咁aggressive。不過希拉里，又何嘗歡喜過你普京呢？佢連人地個心腹梅德韋傑夫（Dmitry Medvedev）個名都唔識讀，當眾話：「梅德...er..whatever」。（心底裏飛雲其實唔怪Hillary，尤其睇極YouTube都係讀唔到）
2008年仲係參議員嘅佢，仲要抽番小布殊嘅「靈魂論」串普京：「特工嘅定義應該係no soul」。之後佢支持2003年美國入侵伊拉克，2011年軍事介入利比亞，已經足以令普京坐立不安。而且奧巴馬同希拉里一樣支持擴充北約，仲好大聲話「歡迎新會員加入」。其實普京明白北約擴充，根本唔會威脅到俄羅斯安全，不過傷害到一班政治精英嘅民族自尊事大。
而真真正正令普京覺得希拉里係威脅嘅，其實只係五年前。2011年，俄羅斯國內爆發連場反普京示威，示威者話普京喺國會選舉造馬。咁大個人，普京bb都未試過比人指住個鼻鬧「你係賊」，「滾出俄羅斯」。掌權十年，第一次覺得自己受到咁大威脅，呢個時候Secretary Clinton仲要煽風點火，唔單止對示威者表示支持，更加對嗰時就快舉行嘅國會選舉表達關注，仲好grand咁話：「美國支持俄羅斯人嘅權利同意願。」哈，你話普京會有咩反應？
或者只係有心人裝無心人，希拉里可能只係耍下官腔，但普京真嬲豬，覺得佢喺度煽動示威，干預俄羅斯內政，火上加油，甚至想乘機推翻佢。就連希拉里本人同俄羅斯嘅政治專家都話，普京係堅嬲!!! 佢眼中美國國務院，簡直仲邪惡過冷戰時期嘅CIA。
克林頓係葉利欽時代，嘗試將俄羅斯誘導去美國認為係正途嘅方向，以市場主導嘅經濟政策同埋以西方自由民主價值為重心嘅政治體制。係希拉里麾下嘅美國國務院，亦都成日批評俄羅斯嘅選舉有幾唔自由唔民主，普京舊年被問到點睇希拉里選總統時，就話「正如俄羅斯人話齌，兩公婆一擔擔」（As we say, husband and wife are the same Satan.），深深的牙齒印顯露無遺。
對敵人不忍，就係對自己殘忍，呢句說話或者無講錯，普京唔單只無被推翻，仲要2012年再當選總統。當時嘅普京bb已經立心反擊，不過奧巴馬政府似乎未feel到，仲淡淡定咁，取笑認為俄羅斯係「地緣政治上最大敵人」嘅羅姆尼叔叔好out，話「你呢啲思想仲留喺80年代，冷戰已經over左20年喇！」
相關文章：奧巴馬助希拉里為敗選卸責？「秋後算帳」激發美國政治內鬥
奧巴馬，你也實在太年輕了。普京的確無放棄過佢嘅復仇大計，聰明嘅佢仲識轉移視線，近年喺國外動作多多，都係為遮蓋國內嘅問題。烏克蘭要選個親西方政府，佢就當機立斷攞返克里米亞；敘利亞內戰等你啲反抗軍虛耗得七七八八，就索性派俄軍入去打，守住敘利亞呢個中東最重要嘅盟友。
之後個故事點發展落去，大家都好清楚。民主黨話被俄羅斯政府hack，連特朗普意外贏左大選，都話係俄羅斯黑客搞鬼。美國迎來一個歷無前例咁親俄嘅特朗普政府，大家都見普京有幾開心，克林頓兩公婆今次仲要一鋪玩完，對美國政壇延續20年嘅影響力告終。
無論你依家點指摘俄羅斯影響大選結果，都已經阻止唔到特朗普做總統呢個現實。
克林頓當日笑葉利欽笑到肚都攣，可惜笑到最後不是你喔。
【專頁：新聞講故事】國際大事一看就懂：最易入口的新聞！趣味養份兼備