世界圓又圓,職場忌隨便睇唔起人

被記者問到點睇林鄭疑似參選特首?佢(葉劉淑儀)話:「以前佢都做過我下屬咁㗎啫,林太好能幹……」唔知葉太當年對呢位下屬友唔友善呢?轉眼阿下屬就變成疑似競爭對手,一個唔覺意仲可能……

有句說話叫「見高拜,見低踩」,適量的見高拜其實系無乜問題,對住叻過/高級過自己嘅人賣嚇口乖,你開心對方又高興,合作上嚟更順暢。但見低踩嘅人就高手極有限,最少系一個短視及心地差嘅人。
小薯要整蠱你,總有佢嘅方法
Jennifer喺一間PR agency做manager,世界女一名,同公司幾個高層都好熟,放工會一齊飲嘢,上位上得好快。但同時佢都系一個好心急嘅人,對住「無價值」嘅人,佢懶得浪費時間去social,大半年前佢請咗個Year 4學生做part time,叫親對方做嘢都呼呼喝喝毫不尊重,個妹妹幾次比Jennifer鬧到喺廁所喊,最後當然繫辭職,辭職嗰日亦唔繫好多同事願意同一個小part time 食farewell lunch,整體而言,呢間公司帶比妹妹嘅回憶都幾差。
個世界真繫好細的,一年後,妹妹入咗間大機構做小薯,而咁岩呢間公司就係Jennifer間agency嘅其中一個大客!Jennifer send email嚟問間公司「今年續唔續約呀?最近有無咩大型活動要幫手搞呀?」send極都無人覆,因為,負責check email嗰個就係成日比佢鬧嗰個妹妹,就算Jennifer打電話嚟問,接電話嗰個都系妹妹,妹妹無表明真身,就只系話:「email我地收到,總之有需要就會覆你。」 與此同時,妹妹亦好努力揾其他agency資料比老闆睇,系咁說服老闆試新公司,老闆一來唔知咁多嘢,二來換間agency咁小事,速戰速決啦,價錢岩咪換嚇試嚇新嘢囉。結果,Jennifer就喺完全唔知自己衰咩嘅情況下無咗個大客。
點解舉呢個例呢?我想講,唔需要諗到話妹妹轉頭做咗老闆個老婆咁極端,佢依然系小薯,但都已經有足夠力量教訓「見低踩」嘅Jennifer,做人呢,真系要明白世界是圓的,凡事唔好去得咁盡,亦唔好亂咁睇唔起任何人。
唔好輕易覺得一個人「已消失」
再唔系你睇下疑似特首候選人葉劉淑儀,由入境處處長升到保安局局長,喂以為自己繼續上架啦,點知差錯步就連帶個髮型一齊比人瘋狂攻擊,七一50萬人遊行之後辭職去美國,好啦你以為佢從此消失,當日若有下屬為擦鞋埋佢身,應該都會覺得哎呀落錯注。點知過幾年葉太就返嚟選立法會議員,補選輸比陳方安生,以為完了吧如無意外,點知之後直選又比佢選到,仲連任添。
2016年7月,被記者問到點睇林鄭疑似參選特首?佢話:「以前佢都做過我下屬咁㗎啫,林太好能幹……」唔知葉太當年對呢位下屬友唔友善呢?轉眼阿下屬就變成疑似競爭對手,一個唔覺意仲可能……
所以真系「莫欺少年窮」,唔好隨便睇小年紀、職位細過自己嘅人,人嘅際遇好多可能性。
(文章純屬作者意見,不代表香港01立場。)