專訪︱莫文蔚細訴5首廣東舊歌的故事：希望作品唔會被時間淘汰！

上回講到，將於六月舉行的《絕色莫文蔚世界巡迴演唱會香港站2021》，莫文蔚（Karen）屆時會為香港觀眾度身訂造不一樣的「終極歌單」，「今次返嚟香港，好多之前冇機會唱嘅廣東歌，都會擺入去今次呢個騷，所以Rundown會有好多調整，加咗好多廣東歌。」
所以來到專訪的第二部份，話題焦點順理成章圍繞Karen唱過的舊廣東歌，先由記者親自挑選5首作品：《潮濕》、《婦女新知》、《幻聽》、《透視》和《瑕疵》，再讓她分享當年跟創作相關的經歷與回憶。
碰巧今年是收錄《潮濕》的廣東大碟《全身莫文蔚》推出25周年，就由當年那幅震撼六百多萬香港人、至今仍然是本地樂壇唯一一張流行歌手背部全裸入鏡的唱片封面照說起，Karen笑言這是她與時任專輯創作總監的林海峰一手策劃。「當年個腦成日都有呢個唔著衫、趴喺梳化嘅Image，（我知自己）終有一日係要影幅咁嘅相！」一個夠膽諗，一個夠膽影，結果成就這幀經典之作誕生。
撰文：游大東

專訪︱莫文蔚6月紅館騷後告別大舞台　稱見好就收：唔想死做爛做

#1 《潮濕》（1996）

來潮最易令人疲乏 濕得太過份 共你這麼愛情就似 春天空氣裡頭 是太翳焗而濃密 偏將我貼實 共你這麼愛情就似 春天的感覺潮和𣲷

「《全身莫文蔚》真係好前衛，型到爆！其實一開始已經決定咗要咁做（唱片硬照與歌曲風格），因為嗰陣時（1996年 ）相比台灣作風，香港其實都幾保守，好多嘢都話太前衛，啲人唔會接受，而滾石唱片就好大膽，所以簽咗呢間公司之後，自己有好多嘢都想試，有好多Ideas，咁難得（有此機會）梗係做啦。」

「喺香港有冇話乜嘢係唔得？總之你係新人，如果你係靚靚女女，第一擊就一定係周慧敏嗰隻（標準），一定係走『玉女』路線，冇第二隻Formula㗎，到你之後掂咗喇，你就可以開始表露真我，做第二啲形象，所以初初1993年出道嘅時候（獲星光唱片發掘，推出大碟《Karen》），我係被迫扮玉女，啲頭髮要攣攣哋（鬈曲），著條圓枱裙，唉，捉到鹿都唔識脫角嘅，我隻腳咁靚，有咩理由著條咁大嘅圓枱裙遮晒？」

「總之去到滾石嘅時候，就已經急不及待將我最Yeah嗰一面釋放出嚟，而《全身莫文蔚》（背部全裸）呢個Concept係我Propose嘅，因為我同Creative Director，即係林海峰諗緊呢隻碟嘅成個Image，我就同佢講，我個腦成日都有個Image，就係唔著衫，趴晒喺個梳化度，（我覺得）總有一日我係要影一幅咁嘅相，我就同阿Jan講咗呢件事，佢就話：嘩，唔係嘛？係就嗱嗱聲即刻影喇。咁就出咗呢張相，當然『全身』係食字，意思係重新出發，再加埋呢張相，其實成件事係好完整，啲歌又咁新穎前衛，總之盡量去做。」

「《潮濕》呢首歌竟然係李宗盛寫嘅（另一位作曲人是梁伯君），一聽，咦，乜咁High嘅？即係原來佢都有狂野嘅一面囉。其實嗰陣時我仲係咁新，基本上可以同邊個合作、唱邊個（創作）嘅作品，我都真係𦧲飯應，愈唔一樣就愈好啦，我次次都想試新嘢。首歌應該係講一段男女關係，其實我當時亦未咁識鑽研歌詞，總之有我就唱，好似一個演員咁，有劇本就會去演，而我係鍾意呢首歌，覺得所有嘢都好『劥』（猛烈）、好正、好有型。」

#2 《婦女新知》（2000）

今日我嚟教大家整甜品 首先用滾水沖開Expresso粉 再擺啲Lady Fingers落去浸到腍 另一方面將啲蛋白攪一陣 起泡就加啲Kahlua再攪勻 最後兩樣倒埋一齊整到一層層 恭喜你咁就完成咗個Tiramisu 一個世界馳名嘅意大利甜品

「《婦女新知》係得意嘅，我又未試過Rap，所以當年收到呢首歌嘅時候，會問：得唔得㗎？唔知㗎喎！咁就試下啦！成件事係好玩，因廣東話嘅Rap（當年）已經少啲，仲要Rap嘅嘢係好過癮，最正嘅就係Wyman（黃偉文）將整Tiramisu嗰段嘢（食譜）寫咗落去，因為我真係識整Tiramisu。」

「故事係我初初返香港入行嗰陣就已經識Wyman，嗰陣時佢仲係（商台）DJ，因為我喺意大利讀書嘛，大家都對我嘅讀書生活好好奇，跟住我話當年一去到意大利，第一樣嘢學識嘅，就係啲同學仔教我整Tiramisu，我就將（過程）形容咗畀Wyman聽，點知佢一直記住呢件事，到（多年後）佢寫呢首歌畀我，就將呢樣嘢寫咗入去，當年Tiramisu喺香港仲係好罕有，加上首歌係透過買嘢去表達同一個男人嘅關係，又有形容港女（作風），成件事真係好精彩。」

#3 《幻聽》（2001）

絲質的被單摩擦黑兔毛背心 男燒衣主角吐出一句一句南音 和金嗓子擁吻 水龍頭劇震 誰於珍妃井裡 喊啞了靈魂 講真我只不過想我們結婚 憑積分贈飲 怕解僱便凍薪 查詢班機請按 那忍看長平自刎 王昭君滿腔悲憤 母親節愈來愈近

「《一朵金花》呢張唱片係好High，比起《全身莫文蔚》再High啲，又係喺滾石啦，佢哋好玩得，因為當時同伍佰已經好熟，之前同佢喺台灣合作過（1998年合唱《堅強的理由》），所以決定要做隻廣東大碟之後，唱片公司就同伍佰講：伍佰老師你幫Karen做隻廣東碟啦，你想點玩都得，總之你諗得出就做啦，自由度真係好大！」

「我記得當時我哋仲喺灣仔嘅『唐樓』（由羅大佑開設），（錄音室）係頂樓嗰層，對住維港海景，成隻碟就係喺嗰度錄，滾石成日都用，咁就好High、好Experimental嘅一次。講起伍佰，我覺得佢直頭係神級，Rock當然冇人唔知啦，但係佢將Rock加入電子音樂元素，變咗係一樣之前冇人做過嘅嘢，仲要全部都廣東話喎，啲火花真係（爆到）霹靂啪喇，成件事冇好刻意去Plan，但就係碰撞到呢件事，總之就係憑感覺去做，去盡佢。」

「我又冇去考究林夕嘅歌詞入面有咩訊息，但嗰個Groove係好正，好好Feel，同埋啲字古靈精怪，我都唔知唱乜，所有嘢都係講《幻聽》呢個Image，所有嘢都係九唔搭八，但又Blend埋一齊，首歌好Colorful，每次開Concert都走唔甩，一定會唱。」

#4 《透視》（2003）

世界沒有孔雀 你會看到知更鳥嗎 世界厭棄鑽石 你會發覺沙的美好嗎 若是現在問你 欣賞我嗎 或是純粹觀賞我嗎 長裙極黑願望極藍 不想身邊的你看漏眼 紅鞋極花寂寞極難 十萬件衫穿不上心間

「《透視》呢首歌都算係我入行以來一首好重要嘅作品。（係你入行以嚟第一首四台冠軍歌）係咩？WOW，係呀？！我都唔知呀！（後來經理人向她說，是知道有這件事）呢首歌係霆鋒寫畀我，一來我真係識佢，二來嗰段時間我哋係鄰居，住喺半山區同一幢大廈，當然唔係成日都見到佢，因為我都唔係成日留喺香港，總之識佢好耐。」

「當然唔係因為佢係我鄰居，所以先有《透視》，記憶中亦都唔係我特登叫佢寫首歌畀我，好似係佢話佢作咗首歌畀我，聽完之後真係覺得好正，真係好用心去寫，同埋周耀輝寫嘅第一句歌詞已經好勁，『世界沒有孔雀』，咁都諗得出真係好正。（點解咁樣認為？）可能係你唔會諗到一首廣東歌會有句咁嘅歌詞，聽嘅時候好震撼！」

#5 《瑕疵》（2015）

K: 早知道誰也有很多不美好 J: 十分想將惡習全部也制限住 K: 只需要還有美好那面蒙蔽住 J: 但始終本性未能抑壓 一次 K: 要是病態漸露出請記住漂亮時 J: 還是我也想偷偷靠此 證實頑皮極你亦會寬恕 K: 或懷念某次 J: 盼你能明白用這詭計也有一點羞恥 K: 誰人用愛煉藥將你治癒 J: 要愛我有陣時不易 K: 不捨得不寬恕

「關於《瑕疵》，旋律好靚，線條好豐富，我都唔知點解當初Juno會搵我（合作），我覺得呢首歌係一首好犀利嘅作品，即係（以往）冇呢啲咁嘅合唱歌，但我覺得合唱歌就係應該咁（處理），唔係就咁唱啲Harmony（和聲），或者係你一句我一句，而係好似《瑕疵》咁，嗰對Couple，大家對於同一件事都有唔同諗法，彼此會跟住旋律，有佢游走嘅方向，有時得我自己，有時又會（同男方）合埋一齊，啲字會疊埋一齊，跟住又會各自講其他嘢，Wyman啲歌詞真係寫得好靚！」

「所以當我一聽到呢首歌嘅時候，我係嘩咗出嚟，心諗香港幾時開始有啲咁高級嘅作品，好高級，真係好高級。至於錄音方面，我哋一齊喺Studio錄，錄晒我唱嘅部份先，當然Juno都喺度啦，因為佢係監製，佢係Hands-on所有嘢，跟住到佢錄。（所以今次演唱會都應該會唱？）得我自己一個就難唱啲囉，哈哈！」

「廣東話我講一世㗎嘛，唔會唔記得！」

記者作為莫文蔚的忠實擁躉，一直認為香港市場待薄了她，笑言假若20多年後的今天，Karen才正式出道當新人，她在樂壇的路一定會發展得更好更順利吧？對此她不以為然，認為際遇如此，只能順其自然地將事情做到最好，沒有最好的時機，亦沒有最壞的時機。「我覺得所有嘢都係整定嘅！好多人都同我講，話《全身莫文蔚》呢張唱片，已經25年前喇，但而家你拎番出嚟聽，都會覺得啲歌點解仲咁『新』嘅？點解而家仲咁啱聽嘅？」

Karen認為，作為一個專業的藝人，不應將視野只停留在某個時刻、某個地方。「我覺得作為一個Artist，一直都希望我嘅作品係唔會因為時間而被淘汰，希望可以一路Live On（存在），就算而家嘅Generation聽到我以前嘅歌，都可以被感動，或者聽得明，或者有Feel，我覺得呢樣嘢係我想做到，做到先叫成功。」所以無論唱哪種語言，都是順勢而行，「我唔係太在乎用咩語言去唱，即係廣東話、國語同英文，都係可以Reach Out到唔同觀眾。」她又指，不會因為自己少講、少唱廣東話而生疏，「唔會，點會呀！廣東話我講一世㗎嘛，唔會唔記得，或者講得渣咗，呢件事唔會發生喺我身上，哈哈！」