葉翠翠發文連講三次「失望」　疑夫妻失和：為咗呢個家傾盡所有

葉翠翠2015年同拍拖僅半年嘅建築師男友周曉東（Raymond）閃婚，婚後先後誕下3個囝囝，住喺3,000呎獨立屋，不時於網上分享生活點滴曬幸福。但呢日佢突然發文指自己「好失望」，惹來不少揣測。

點撃睇葉翠翠3,000獨立屋：

翠翠自2017年約滿TVB後轉型做媽媽KOL，喺KOL界相當吃香，Facebook有超過30萬fans，曾試過月入百萬。翠翠不時喺3000呎獨立屋內拍攝，分享三個囝囝成長，仲有同老公幾咁恩愛。但呢日佢發帖連講三次「失望」：「呢幾日好失望。。。好失望……失望的感覺好可怕……我為咗呢個家真係傾盡所有，毫無保留。每次想起兩個仔，佢哋真係好錫我，最愛係媽 mi ，做乜都要預我一份。呢幾日我都陪佢哋瞓，佢哋一瞓醒就見到我真係好開心，即刻要同我面貼面咁。」

相片中只有2個囝囝，翠翠有回應話因為細仔仲未識安慰錫媽媽，唔少網友留言關心，翠翠指「一言難盡」、「已經唞咗足足3日先出呢個post。」令人思疑佢同老公周曉東發生爭執，對此翠翠就未有回覆，只係話「Facebook係post自己想講嘅嘢。」相隔兩日，翠翠心情似乎平復返，佢上載愛貓沖涼片段，仲同網友有問有答。就呢件事搵過翠翠了解，但截稿前暫未有回覆。