媽媽教功課失控　頸巾勒子不遂上吊　心理學家：要留意呢啲特徵

灣仔石水渠街昨日（30日）發生家庭悲劇，43歲母親近月成為全職媽媽，照顧分別7歲、6歲及5歲的子女。昨在家中教長子做功課時，突然情緒失控，企圖以頸巾企圖勒死兒子未遂，再反鎖自己上吊。疫情下全職媽媽要面對什麼壓力？身邊人可留意什麼特徵，避免悲劇發生？有心理學家提醒，一旦萌生尋死念頭，宜盡快求助。「唔可以拖，一定要快！一般市民冇受過專業訓練，唔識如何應對朋友嘅情緒壓力。如果有咁嘅情況，避免傷害自己或家人，必須要搵專業人士協助。」

按圖即睇壓力爆煲8大特徵

教子做功課　情緒突失控

涉事家庭居於灣仔石水渠街其發大廈，59歲戶主與43歲妻子育有7歲長子、6歲次子及5歲幼女。事發時父親上班，母親在家裡指導長子做功課，期間情緒失控，大喊要將兒子殺死，企圖以頸巾勒死兒子，兒子成功掙脫。未幾母親將自己反鎖房間，以兩米長尼龍繩掛在碌架床上吊。

父親趕到後報警求助，救護員到場把母親送到律敦治醫院急救，醫生初步診斷為腦幹死亡。據悉，涉事家庭的印傭三個月前離職，女事主數月前辭去工作，開始擔任全職媽媽，疫情下丈夫經營的貿易工程公司亦生意淡薄。

相關文章：母教功課期間情緒失控　頸巾勒7歲子不遂上吊　送院證腦幹死亡

按圖即睇疫情下媽媽心聲：

先察覺情緒 善用網上資源

註冊心理學家程衞強表示，不少家長都曾經歷，在教導孩子做功課的時候出現情緒，提醒重點是首先察覺自己情緒。「如果察覺唔到自己情緒，直到爆嗰下，已經冇得救。當發現情緒嚟，可以休息10分鐘，洗個面，抖一抖，轉第二樣功課先，尤其而家聖誕節假期，起碼去到1月幾先返學，有大把時間可以做。」

他補充，家長並不是專業老師，可嘗試在網上尋找其他教學方法。「網上有啲教學教小朋友做功課，有數學、語文概念。家長用自己一個方法，講嚟講去小朋友都唔明，呢個方法就係唔work（可行）！家長、小朋友都會炆，互相影響大家情緒。」

按圖即睇減壓5招

疫情下迎來各方壓力　宜與伴侶思考解決方法

涉事家庭的丈夫近來生意淡薄，程衞強指，假設媽媽是主力照顧小朋友，亦可能會擔心經濟前景、家庭的收入支出，產生焦慮情緒。「加上丈夫做生意，佢似係又唔可以幫到好多手，會出現無力感。」他續指，家傭離職，加上疫情，亦是壓力來源。

「撞啱家傭離職，要頂埋本身家傭嘅工作。丈夫返到嚟，佢可能意識唔到太太壓力咁大。『點解呢啲未執架？』、『碗又未洗？』、『又食外賣唔煮餸呀？』，呢啲別人嘅要求，加咗喺佢身上，都係一種外來壓力。加上疫情下，會有擔心、無助、恐懼。第一是擔心健康，其次停課咁耐，可能好緊張小朋友學業，呢啲都係無形恐懼。」

他建議先和伴侶溝通，調整期望。「第一要同伴侶溝通，家傭走咗，家務上嘅安排。湊住三個，唔好期望返到嚟一塵不染，老公又可能要幫手洗碗，呢啲大家都要講清楚。」其次是討論家庭經濟上的應對方法。「點樣減開支、動用儲備，或者有冇屋企人、親戚朋友、隔離鄰舍、社區資源可以幫到手，等太太可以去做兼職。當大家傾嘅時候，諗闊啲，我哋會發現係有解決方法。有方法嘅時候，就可以減低無助感，減輕家長面對嘅壓力。」

留意生理和情緒警號　求助唔可以拖

他解釋，若情緒出現困擾，也有若干特徵。「可以分為身體同情緒上嘅徵狀，身體上有食慾改變，暴飲暴食或厭食；睡眠習慣改變，包括渴睡、失眠；出現各種痛症，如胃痛、頸梗膊痛、頭痛；冇動力，成日坐喺度唔郁，或坐立不安。情緒徵狀有集中唔到精神、容易燥底、成日有負面情緒，出現負面想法如『想殺咗個仔』、『你都讀唔到書，冇用架喇』，或有自殺傾向，就需要搵專業人士幫手。」

不少媽媽網民也壓力爆煲，留言「你話想死，朋友只當你講笑發下牢騷」。程衞強強調，若萌生尋死念頭，必須盡快找專業人士協助。「唔可以拖，一定要快！一般市民冇受過專業訓練，唔識如何應對、回應朋友嘅情緒壓力。如果有咁嘅情況，避免傷害自己或家人，必須要搵專業人士協助。志願機構例如撒瑪利亞防止自殺會有免費電話咨詢，如真係有需要面談，其實每個社區都有志願機構做輔導服務。你行入去話俾佢聽『我有情緒問題，有想死嘅念頭，想搵社工傾』，可以搵到一啲資源去幫手。」

另亦有媽媽留言「我教到想死，講真啲功課我識，但我唔識點去教佢」，程衞強指，家長沒有受過教育訓練，或不懂利用方法讓小孩子明白。除了尋求網上資源，他亦建議嘗試補習。「唔係鼓吹家長催谷小朋友，但如果真係教唔到，或學校教學未必適合小朋友，補習都可能係個好做法。」

相關文章：竹內結子去世｜疑患產後抑鬱家中自殺身亡　必要留意患者8大病徵