【美國大選辯論．博評】你估踢波？問邊個贏，係問錯問題

支持特朗普嘅係咩人？往往係同支持脫歐嘅差不多嗰類人。教育程度低，收入低，白人，保守。最重要係，反建制，拆大台，唔信權威。同埋，反智……特朗普畀人捉到講大話講錯嘢？Ｗho cares？我男朋友係古惑仔？多謝你提醒。我就係鍾意佢係古惑仔。

舊同事唔在香港，落機就WhatsApp問我美國大選辯論，問曰：「邊個贏？」

選總統你可以問邊個贏，世界盃可以問邊個贏。但今次辯論問邊個贏，就問錯問題。因為，唔係校際比賽，呢場辯論根本冇評判打分，何來有得「邊個贏」。

其實問「邊個贏」嘅，係想問，「你覺得」或者「其他人覺得」「邊個贏？」。而除非你好有份量，否則，就冇乜人care「你覺得」。擂台上個拳手畀人打到豬頭咁，女朋友都可以話「在我心目中你贏咗」，但，who cares？

所以重點係「其他人覺得」， 畢竟perception is reality。既然冇評判冇客觀標準，咁講100次就變真。好多人話特朗普贏，就係特朗普贏。

傳媒要特朗普輸　佢就冇得「贏」

咁，美國人覺得邊個贏？CNN民調就話，62%覺得希拉里表現較好。 英國嘅《經濟學人》（Economist）更加講到明，A win for Hillary Clinton。

但，又如何？其實係冇意思的。唔係批評傳媒有晒預設立場唔中立，美國傳媒會為候選人背書就係一貫作風。《紐約時報》（New York Times） 周末撐希拉里當然唔令人意外。 同好多人想像唔同，《經濟學人》唔係特別傾向共和黨或民主黨，佢哋甚至自稱唔係左亦唔係右。近3屆《經濟學人》的確係背書民主黨候選人，但之前兩屆唔係。今屆嘛，佢哋未做正式背書，但必定係撐希拉里。佢撐特朗普嘅話，我印呢篇文出嚟食咗佢。

英美傳媒明顯唔鍾意特朗普，好似睇波咁，點都係confirmation bias。希拉里篤中對方死穴就係醒目，特朗普篤中就係冇風度嘅爛仔。難聽講句，佢表現點好都最多畀人話「打成平手」。除非希拉里暈低，否則佢根本「冇得贏」。傳媒就係要特朗普輸，要佢出醜。

希拉里唔止係傳媒寵兒，亦都係市場寵兒。當大家普遍認為希拉里「贏咗」，亞太區股市明顯反彈。墨西哥披索之前因為特朗普嘅狂人言論而受壓，辯論後亦都反彈。市場一片歌舞昇平。

有冇令你諗起乜？係，就係英國脫歐之前嘅情況！

講大話斷正再非公關災難的年代

但，又如何？ 唔好信啲三流公關講咩講大話就公關災難，話要講真相。《經濟學人》早兩期封面講「Post-truth Politics」，後真相政治。寫得極好，記住去睇。講大話係美德，因為選民唔會理。

邊個care真相？邊個話真理愈辯愈明？以前資訊唔流通政客講大話可以過骨。而家資訊咁發達，大話精即時現形畀人拎出嚟鞕，一講錯就公關災難？你以為啦。歡迎嚟到反智時代。My ignorance is just as good as your knowledge。科幻兼科普作家艾西莫夫（Isaac Asimov）講嘅。

特朗普畀人捉到講大話講錯嘢？Ｗho cares？我男朋友係古惑仔？多謝你提醒。我就係鍾意佢係古惑仔。《華盛頓郵報》（Washington Post）、《紐約時報》全部都試過「掃盲」。《Politico》網站更加逐隻字睇，發現佢每3分鐘講錯一次嘢。

但，又如何？英國脫歐時一樣，有良心嘅知識分子同傳媒，一樣搞「掃盲」。對於脫歐派政客同傳媒嘅妖言惑眾，隨口講當秘笈，知識分子信「愈辯愈明」。列舉晒邊啲故事錯，邊啲嘢誇大。

又如何？脫歐派話脫歐可以每個星期慳返3.5億英鎊，投入醫療體系NHS。倫敦前市長約翰遜（Boris Johnson）坐住架巴士拉票，就係印住呢句嘢。傳媒狂轟此人吹水唔抹嘴無中生有。但，你而家搵佢找數咯。

電視辯論唔會改變基本盤　有利特朗普

特朗普有嘅係時間。佢根本唔使點落力，反正佢一早當自己係underdog冇得輸，而家已經賺晒。一兩年前根本冇人信佢可以代表共和黨出戰，更唔好講可以同希拉里勢均力敵。對，正如脫歐公投前冇耐都冇人覺得脫得成歐。

辯論當中，主持人當然拎返特朗普老屈奧巴馬唔係在美國出世一事嚟講。呢個聽講亦正係希拉里嘅策略，在鏡頭面前拆穿此人大話連篇。但冇用嘅。會因為佢係大話精而唔投佢嘅，一早跳船啦。而家留得低嘅，全部係死士。或者花生友。你話佢差？希拉里咪又一樣咁差。呢，希拉里爭取咗咁多年咪又得個桔。「係時候變下都好」。

（文章純屬作者意見，不代表香港01立場。）